Gratë në vendet nordike po marrin pjesë në një tubim në internet ‘në solidaritet’ me kryeministren finlandeze Sanna Marin, e cila përballet me kritika për videot private që u zbuluan në internet javën e kaluar.
Gratë finlandeze dhe daneze kanë ngarkuar video të tyre duke kërcyer dhe festuar në YouTube dhe faqe të tjera të mediave sociale, duke etiketuar postimet me #SolidaritywithSanna.
Në nivel global, politikanët kanë dalë në mbrojtje të Marin, me deputeten australiane Fiona Patten që shkruan se Finlanda duhet ta konsiderojë veten një ‘vend mjaft me fat’ nëse gjëja më e keqe që ka bërë kryeministri i saj është ‘të lëshojë avull në një festë’.
Shpërthimi i mbështetjes vjen pasi 36-vjeçarjes i kanë dalë dy video private, njëra që tregonte festimin e saj me një grup miqsh dhe një tjetër ku po kërcen e përqafuar në një klub me këngëtarin finlandez Olavi Uusivirta.
Videot ndezën polemika pasi disa shikues sugjeruan se sjellja e Marin ishte ‘e papërshtatshme’ për liderin e një kombi, ndërsa të tjerë vunë re se njerëzit në sfondin e njërës prej videove mund të dëgjoheshin duke diskutuar për kokainën, duke nxitur spekulime se Marin ishte droguar gjatë natës së saj jashtë.
Marin mohoi se kishte bërë diçka keq pasi videot u bënë publike, por u ankua për shkeljen e privatësisë së saj. Ajo këmbëngul se festa u zhvillua në një rezidencë private disa javë më parë dhe se priste që koha e saj jashtë detyrës të mbetej konfidenciale.
“Kisha pak kohë pushim dhe e kalova me miqtë e mi. Dhe unë nuk bëra asgjë të paligjshme.” – tha Marin, e cila tha se ajo nuk bëri gjë tjetër veçse ‘vallëzoi, këndoi, përqafoi miqtë dhe piu alkool’. Ajo ka theksuar gjithashtu se asnjë mbledhje qeveritare nuk është planifikuar apo është mbajtur gjatë asaj fundjave.
“Shpresoj që në vitin 2022 të pranohet që edhe vendimmarrësit të kërcejnë, të këndojnë dhe të shkojnë në festa.” – vazhdoi ajo.
