Kreu i PD-së Berisha ka akuzuar kryeministrin Rama se po përdor dokumente e fakte të falsifikuara për të goditur kundërshtarët politikë duke iu referuar hetimit të SPAK-ut ndaj kreut të Partisë së Lirisë, Meta.
Në një shënim në Facebook, kreu i selisë blu shkruan se kreu i qeverisë është i tmerruar nga ajo që e pret për vjedhjet e mëdha që u ka bërë shqiptarëve me aferat e inceneratorëve, Portit të Durrësit, Butrintit, PPP-ve, çmimeve stratosferike e aferave të tjera që mbajnë firmën e tij e po përdor gjithë shtetin për të goditur kundërshtarët.
Në fund Berisha shkruan se Rama është i pashpresë dhe se nuk do i shpëtojë ndëshkimi të rëndë popullor.
Edi Rama, je i pashpresë! Këto javët e fundit, i tmerruar nga fati i afërt që e pret për vjedhjet e mëdha që u ka bërë shqiptarëve, gjykimi dhe ndëshkimi popullor për vjedhjet e mëdha me aferat e djegësve, portit të Durrësit, Butrinit me prokurimet sekrete, PPP, bordet e çmimeve stratosferike dhe aferat e tjera që mbajnë firmën e tij, Edi Rama ka shkrirë në një të vetëm Shërbimin Informativ, Komisionin e Dosjeve të Sigurimit të Shtetit, SPAK-un e partisë dhe i ka shndërruar në aneks të zyrës së tij. Me qëllimin e vetëm fabrikimin, falsifikimin, manipulimin e paskrupullt të pseudo-fakteve, pseudo-dokumenteve për kundërshtarët politikë, në rastin konkret kundër kryetarit të Partisë së Lirisë, Ilir Meta. Duke dënuar me forcën më të madhe këto akte të shëmtuara të regjimit mafioz të Edi Ramës, të bazuar në dhunimin e votës së qytetarëve, vjedhjen e papermbajtur te pasurive dhe fondeve publike, drogën dhe krimin, i them vasalit të Aleksander Vuçiç-it se je i pashpresë dhe se, nuk ka manipulim, shpifje apo falsifikim as dhe ligj i votuar nga mazhoranca kallpe që do të shpëtojë ty nga ndëshkimi i rëndë popullor. Ti dhe shteti yt mafioz njëpartiak do të keni fundin e merituar! Sb.” – shkruan Berisha.
