Ambasadorja Yuri Kim është takuar me kreun e Prokurorisë së Posaçme, Arben Kraja, pas kthimit të tij nga SHBA-ja.
Diplomatja amerikane publikon një foto nga takimi mes tyre dhe shprehet se vizita e Krajës në Uashington “forcon më tej bashkëpunimin SHBA-Shqipëri në luftën kundër korrupsionit dhe krimit të organizuar”.
“Kënaqësi të mirëprisja Kreun e SPAK Arben Kraja pas vizitës së tij zyrtare në Uashington, e cila forcon akoma më shumë bashkëpunimin midis Shteteve të Bashkuara dhe Shqipërisë në luftën kundër korrupsionit dhe krimit të organizuar. Shtetet e Bashkuara do të vijojnë të mbështesin fuqimisht punën e SPAK dhe institucioneve të tjera të reformës në drejtësi.”– shkruan Kim.
Pleased to welcome back SPAK chief Arben Kraja after his official visit to Washington, which further strengthens 🇺🇸🇦🇱 cooperation in the fight against corruption & organized crime. 🇺🇸 will continue to strongly support the work of SPAK & other institutions of justice reform. https://t.co/vFc2vRFBJZ pic.twitter.com/IRwuoYf27H
— Ambassador Yuri Kim (@USAmbAlbania) August 24, 2022
Një ditë më parë, ambasadorja Kim mbështeti hetimet e nisura nga SPAK ndaj ish-presidentit Ilir Meta, në kuadër të një kallëzimi penal të kryer nga ish-deputeti Halit Valteri.
Kim shkroi se kërcënimet ndaj gjyqtarëve dhe prokurorët nuk duhet të pranohen më si normale. Sipas saj një sjellje e tillë nuk i takon një vendi anëtar të NATO-s, ndërsa shtoi se reforma në drejtësi qartazi po jep rezultateve, duke iu referuar hetimit ndaj Metës.
Sekretari i Përgjithshëm i Partisë së Lirisë, Tedi Blushi reagoi me ironi lidhur me komentet e ambasadores duke thënë se edhe PL dënon kërcënimet e hapura që Edi Rama bën ndaj SPAK-ut, duke publikuar edhe disa raportime të bërë para ca kohësh për këtë në disa media, kur kryeministri kërkonte nga Prokuroria e Posaçme të merrte nën hetim ish-kryeministrin Sali Berisha dhe presidentin ende në detyrë asokohe Ilir Meta. Ndërsa kujtoi edhe hetimet e pakryera për incenerarorët.
