Kryetari i Partisë së Lirisë Ilir Meta ka folur përsëri për hetimet e SPAK-ut ndaj tij, duke i quajtur si përpjekje të qeverisë për të spostuar vëmendjen.
“Përpjekjet e dëshpëruara për të keqpërdorur ‘krijesat’ e Partisë në drejtësi për të spostuar vëmendjen e opinionit publik me ‘hetime’ qesharake ndaj drejtuesve të opozitës tregojnë vetëm përpëlitjet e fundit të regjimit kriminal për të shtyrë me ditë dhe javë llogaridhënien e tij të pashmangshme.”- shkruan Meta.
Sipas tij, “krijesat e Partisë” siç e quan ai SPAK-un duke iu referuar vetë deklaratës së kryeministrit Edi Rama të pak muajve më parë, që marrin urdhra në Kongresin e partisë-shtet veç forcojnë bindjen se janë “një seksion i Rilindjes” dhe përgjegjëse po sa ajo për korrupsionin galopant dhe lidhjet e krimit me politikën.
Meta u bën thirrje qytetarëve që ta ndjekin në një intervistë që do japë sot në orën 14:00 në Neës 24.
REAGIMI I PLOTË I METËS
Hetimet tona vazhdojnë të thellohen dhe rëndohen jo vetëm për aferën e zezë të inceneratorëve, jo vetëm për superaferën e Portit të Durrësit kosto e të cilit mund të shkojë deri në 5 miliardë euro për taksapaguesit durrsakë dhe shqiptarë, por edhe për shumë afera të tjera, garant dhe përfitues kryesor i të cilave është Ramoviçi dhe për të cilat do të përgjigjet deri në një.
Përpjekjet e dëshpëruara për të keqpërdorur “krijesat” e Partisë në drejtësi për të spostuar vëmendjen e opinionit publik me “hetime” qesharake ndaj drejtuesve të opozitës tregojnë vetëm përpëlitjet e fundit të regjimit kriminal për të shtyrë me ditë dhe javë llogaridhënien e tij të pashmangshme.
Krijesat e Partisë që marrin urdhra në Kongresin e partisë-shtet veç forcojnë bindjen e të gjithë shqiptarëve të ndershëm se janë një seksion i Rilindjes dhe përgjegjëse po sa ajo për korrupsionin galopant dhe lidhjet e krimit me politikën. Monopolin e Drejtësisë e ka vetëm Populli i Shqipërisë dhe ai do të jetë Gjykatësi më i drejtë shumë shpejt.
Ndërkohë sot në ora 14:00 kam kënaqësinë të jem në lidhje live me Ola Brukon në NEËS 24, duke ju ftuar të gjithëve sipas mundësive të më ndiqni.
