Presidenti Bajram Begaj ka pritur sot në një takim kryeministrin e Luksemburgut Xavier Bettel, i cili ndodhet për një vizitë zyrtare në Shqipëri.
Gjatë këtij takimi, zyra e shtypit në Presidencë thotë se Begaj ka vlerësuar marrëdhëniet mes dy vendeve në këtë vit që shënon 100-vjetorin e njohjes së Shqipërisë nga Luksemburgu dhe 50-vjetorin e rivendosjes së marrëdhënieve diplomatike.
Begaj ka shprehur mirënjohjen për ndihmën e shtetit të Luksemburgut për përballimin e dëmeve të shkaktuar nga tërmeti i 26 nëntorit në Shqipëri.
“Lidhur me procesin e integrimit evropian si dhe vëmendjen që shoqëria dhe institucionet shqiptare i kushtojnë atij, Presidenti Begaj vlerësoi mbështetjen e pakursyer që Luksemburgu i ka dhënë Shqipërisë dhe rajonit të Ballkanit Perëndimor gjatë gjithë këtij procesi.
Presidenti tha se mbështetja domethënëse e Luksemburgut për procesin e zgjerimit të BE-së me vendet e Ballkanit Perëndimor ka marrë një rëndësi edhe më të madhe gjeopolitike, veçanërisht pas agresionit të armatosur rus në Ukrainë.”– thuhet në njoftimin e Presidencës.
Begaj e ka falënderuar Bettel edhe për hapësirat dhe kushtet që Luksemburgu i ka krijuar komunitetit shqiptar që jeton e punon atje.
Në këtë takim, Bettel dhe Begaj kanë vënë theksin te rëndësia e dialogut Kosovë-Serbi si vetmja rrugë drejt paqes, sigurisë dhe prosperitetit në rajonin e Ballkanit.
Më herët Bettel pati një takim me kryeministrin Edi Rama, pas të cilit të dy dolën në një konferencë të përbashkët për shtyp.
