Qeveria bullgare po shqyrton zhvillimin e bisedimeve me gjigantin energjetik Gazprom për rifillimin e importeve të gazit natyror rus, tha të premten Nova TV Ministri i Energjisë Rosen Hristov.
“Nuk ka ende bisedime aktive me Gazprom por ne kemi dhënë një indikacion se duam të fillojmë negociatat, ose më mirë t’i vazhdojmë ato për të sqaruar disa kushte të diskutueshme të kontratës. Thjesht dërguam informacione se ishim gati të negocionim dhe i kërkuam që të rifillonin kontaktet.” – tha ai, duke specifikuar se Sofja pret një përgjigje nga furnizuesi rus të premten ose më së voni të hënën javën e ardhshme.
Ministri theksoi: “Po flasim vetëm për kontratën e vjetër; ne nuk do të rinënshkruajmë apo negociojmë një kontratë të re.”
Sipas Hristov, Sofja po kërkon të zgjasë afatin për furnizimin e vëllimeve të mbetura të gazit sipas kontratës deri në vitin 2023.
Në prill, Bullgaria hodhi poshtë metodën e pagesës ‘rubla për gaz’ të prezantuar nga Rusia në përgjigje të sanksioneve perëndimore. Sipas rregullores së re, blerësit nga vendet që vendosën kufizime ndaj Moskës janë të detyruar të paguajnë për gazin natyror rus në rubla.
Kundërshtimi i Sofjes për të pranuar kushtet e reja bëri që Gazprom Export të ndalonte furnizimin me karburant për partnerin e tij bullgar, Bulgargaz.
