Tabloidi britanik Daily Mail i ka kushtuar përsëri vëmendje bandave shqiptare të drogës.
Pas zbulimit të një ‘shtëpie bari’ në zonën e Dyke House të Hartlepool, gazeta tregon se si kjo banesë është marrë me qira të paktën 9 herë për t’u kthyer pikërisht në “fermë kanabisi”.
“E vendosur në një rrugë me pamje të zymtë të shtëpive dhe pronave të mbyllura me dritare të thyera, lagja e saj thuhet se është në 2 përqindëshin e fundit të zonave më të izoluara në Mbretërinë e Bashkuar.”– shkruan gazeta.
Megjithatë, deri vonë biznesi kishte qenë i mirë. Muajin e kaluar policia, duke vepruar sipas një informate, gjeti një fermë kanabisi me 75 bimë me vlerë gjithsej 61 mijë paund – pothuajse dyfishi i vlerës prej 32 mijë paundësh të shtëpisë.
Banesa thuhet se është bastisur nëntë herë që nga viti 2015 – dhe në çdo rast janë nxjerrë një numër i madh bimësh kanabisi.
Fakti që kanabisi po prodhohej ende në një shkallë industriale në pronë mund të mos ishte befasi për detektivët.
Por identiteti i të riut shqiptar që u gjet duke u kujdesur për bimët atje me siguri duhet të ishte, kjo sepse ai ishte deportuar pas një bastisjeje të mëparshme dhe nuk duhej të ishte fare në këtë vend.
Në vitin 2019, Ferbent Hoxha, 22 vjeç, ishte dënuar me tre vjet burg për drejtimin e një ferme kanabisi në një adresë në Derby. Droga me vlerë 140 mijë paundësh, ishte gjetur në gjashtë dhoma të ndryshme. Ishin rreth 200 bimë.
Edhe pse vetëm 19 vjeç në atë kohë, Hoxha, i cili kishte qenë në Mbretërinë e Bashkuar ilegalisht, kishte pasur një ‘rol të rëndësishëm’ në operacionin ‘e sofistikuar’ të kanabisit.
Pavarësisht deportimit të tij të mëvonshëm, ai u kthye fshehurazi në Britani për të rifilluar aktivitetet e tij të paligjshme – këtë herë në Hartlepool si dhe në një fermë tjetër kanabisi në Leeds, ku gjurmët e gishtave të tij u gjetën në janar.
Ai u burgos edhe për pesë vjet të tjera këtë muaj. Sipas fqinjëve, shtëpia trekatëshe me tulla të kuqe në Hartlepool ka qenë prej kohësh një “fabrikë kanabisi me kohë të plotë”.
Një fqinj, i cili nuk pranoi t’i përmendet emri, tha: “Nuk mund të jetë rastësi që çdo qiramarrës që merr ndonjëherë me qira vendin është një fermer kanabisi. Unë nuk di asgjë për njerëzit që e marrin me qira, përveç kësaj, nëse përpiqeni të flisni me ta, ata thjesht ngrenë supet dhe thonë ‘Jo anglisht’.”
Hetimet nga Mail zbuluan se prona është në pronësi të dy personave që jetojnë 330 milje larg në Bournemouth. Ata nuk mund të kontaktoheshin për koment.
Por kombësia e Hoxhës sugjeron se ky operacion i kanabisit drejtohet “nga një prej bandave të pamëshirshme shqiptare që po synojnë gjithnjë e më shumë dhe pa mëshirë të rinjtë dhe të pambrojturit në këtë vend.”
Sot, përmes aksesit ekskluziv në raportet e inteligjencës, dokumentet zyrtare dhe analizat e ekspertëve, Daily Mail shkruan se mund të zbulojë shtrirjen e krimit të organizuar shqiptar në Britani dhe se si këto banda po bëhen “më të paturpshme dhe të dhunshme”.
Hetimi vjen pasi një numër rekord shqiptarësh bëjnë udhëtimin e rrezikshëm me varkë përtej Kanalit drejt Britanisë së Madhe.
“Sigurisht, shumë vijnë në këtë vend legalisht, për të punuar shumë dhe për të kontribuar. Por raportet e inteligjencës sugjerojnë se shqiptarët tani përbëjnë midis 40 dhe 60 për qind të emigrantëve që kalojnë ilegalisht me varka të vogla drejt brigjeve tona. Këtë javë doli se më shumë se 700 shqiptarë arritën në Britani me varka të vogla në vetëm një ditë.”- shkruan gazeta.
Këta të ardhur nuk po ikin nga lufta. Vendi nuk ka parë asnjë konflikt për më shumë se 25 vjet. “Ata vijnë këtu, duket, me shpresën për të bërë një jetë më të mirë dhe shumë prej tyre, me dashje ose jo, janë të destinuar për një jetë krimi.”
Javën e kaluar, Daily Mail raportoi se si kapot e krimit nga Shqipëria po dërgojnë “lëkurat e pastra” pa të dhëna kriminale në Mbretërinë e Bashkuar për t’u bashkuar me bandat e organizuara. Kjo do të thotë se kontrollet e mbërritjeve nga kanali nuk po arrijnë të zbulojnë lidhjet midis tyre dhe grupeve të krimit të organizuar.
Ata që sillen në Britani nga bandat e organizuara janë në mënyrë të pashmangshme të cenueshme ndaj rekrutimit në banda – shumë prej tyre tërhiqen në krime të rënda për të shlyer borxhet që u kanë kontrabandistëve të njerëzve.
Aq e shqetësuar është Sekretarja e Brendshme Priti Patel, saqë ajo sapo ka arritur një marrëveshje me homologun e saj shqiptar për të ‘përshpejtuar’ dërgimin e emigrantëve në shtëpi. Politika do të zbatohet javën e ardhshme, me disa migrantë që do të kthehen brenda disa orësh pas mbërritjes së tyre këtu.
Agjencia Kombëtare e Krimit (NCA) thotë se grupet shqiptare të krimit të organizuar kanë zgjeruar me shpejtësi perandoritë e tyre të drogës në Mbretërinë e Bashkuar. Ndërsa më parë ata ishin të shqetësuar kryesisht për kokainën, një treg që ata e kanë dominuar për pesë vjet, ata tani janë përqendruar në prodhimin në shkallë të gjerë të kanabisit – duke përdorur vietnamezët si kultivuesit kryesorë vendas.
