Partia Demokratike ka denoncuar sot ndotjen në Elbasan që vjen si pasojë e grumbullimit të vazhdueshëm të plehrave në një kohë kur inceneratori nuk funksionon.
Koordinatorja për komunikimin në PD, Silvi Bardhi, tregoi disa foto dhe tha se qeveria jo vetëm që ka vjedhur në lidhje me inceneratorin e Elbasanit, por tashmë edhe gropa ku depozitoheshin mbetjet është kthyer në një mal problematik me plehra.
“Mali që shihni në foto është Kilimanxharo e plehrave në inceneratorin e Elbasanit. Është një gropë mbetjesh e kthyer në mal plehrash.
Incenerator nuk ka, por e keqja që ka kapur Elbasanin dhe Shqipërinë ka pjellë këtë mal.”– tha zonja Bardhi. Ajo ngriti 5 pyetje ndaj qeverisë dhe kryeministrit Rama.
Deklarata e plotë:
E dimë që Edi Rama do që ne të mos flasim për asgjë. As për inceneratorët, as për ccmimin e naftës, as kur një polic i tij vret një fëmijë 7 vjeçar, as kur portin e Durrësit e jep me ulje, si ta kishte pronë të gjyshit, dhe as kur krimi hedh ‘vallen e vdekjes’ mu në sy të publikut, të Policisë dhe të ministrit të tij të Brendshëm, i cili nuk bën punë, as të brendshme dhe as të jashtme, sepse nuk është për atë punë, por është aty se ashtu është një punë.
Sot do t’i tregojmë z. Rama një mal me plehra. I cili nuk dëshmon vetëm për ndotjen e mjedisit dhe vjedhjen me djegësit, por edhe marrëzinë e tij dhe të qeverisë që ai drejton.
Sepse, në vend që të adresojë problemet e përditshme të qytetarit, krimn, korrupsionin dhe ndotjen, i lind ideja e një autoparku ku bëhen gara me makina.
Mali që shihni në foto është Kilimanxharo e plehrave në inceneratorin e Elbasanit. Është një gropë mbetjesh e kthyer në mal plehrash.
Incenerator nuk ka, por e keqja që ka kapur Elbasanin dhe Shqipërinë ka pjellë këtë mal.
Duke parë këtë foto duam të bëjmë 5 pyetje:
– Nëse inceneratori i Elbasanit funksionon, pse është ky mal plehrash që i bën hije?
– Nëse nuk funksionon inceneratori, po Landfilli ku është degdisur?
– Për çfarë është ndërtuar inceneratori dhe landfilli i Elbasanit, nëse plehrat e qytetit kanë shkuar 300 metra mbi nivelin e detit?
– Ku kanë përfunduar 27 milion euro të taksapaguesve shqiptarë, nëse inceneratori nuk punon, landfilli nuk shihet, dhe as përdoret, dhe plehrat janë po aty?
– A dëmtohet flora e fauna e zonës, dmth bimët dhe kafshët e zonës, apo më shumë se kaq shëndeti i elbasanasve, nga ky masiv mbetjesh, apo me shëndetësinë falas shërohet ccdo gjë?
Këtij mali me pleh i mungon një gjel. Artisti Astrit Delvina mund ta zgjidhë këtë punë. Trupi i Elisës, mendtë e Borës dhe koka e Ramës të bëhen një gjel gjithë shkëlqim e të vendosen majë këtij plehu.
