Një e treta e Pakistanit është nën ujë si rezultat i përmbytjeve të shkaktuara nga shirat rekord të musoneve, ka thënë ministrja e Ndryshimeve Klimatike të vendit të Azisë Jugore, Sherry Rehman.
“Është i gjithi një oqean i madh, nuk ka tokë të thatë për të pompuar ujin.” – tha Rehman për agjencinë e lajmeve AFP të hënën.
Pakistani shtrihet në 881,913 kilometra katrorë (340,509 milje katrorë), që e bën atë vendin e 33-të më të madh në botë për nga zona, përpara Turqisë, Francës dhe Gjermanisë. I banuar nga pothuajse 242 milionë njerëz, është gjithashtu kombi i pestë më i populluar në botë.
Ajo që po ndodh tani në Pakistan është ‘shumë larg nga një muson normal, është distopi klimatike në pragun tonë’, tha ministrja.
Përmbytjet kanë krijuar një krizë të ‘përmasave të paimagjinueshme’ në vend, shtoi ajo.
Në një intervistë të veçantë me Deutsche Welle, Rehman pohoi se ‘na është dashur të vendosim marinën për herë të parë për të operuar në Indo-Pakistan’ sepse zona të tilla të gjera po mbulohen me ujë.
Sipas Agjencisë Kombëtare të Menaxhimit të Fatkeqësive, numri i të vdekurve që nga mesi i qershorit nga shirat e musonit kishte arritur në 1061 që nga e hëna.
Më shumë se 3,000 rrugë janë shkatërruar, me 130 ura dhe 495,000 shtëpi të dëmtuara nga përmbytjet e shpejta, tha agjencia.
Rehman vlerësoi javën e kaluar se fatkeqësia kishte prekur rreth 33 milionë njerëz në vend.
