Mbrojtja ajrore siriane ka kapur ‘një numër’ raketash izraelite të mërkurën në mbrëmje, por disa kaluan dhe dëmtuan aeroportin ndërkombëtar në Aleppo, njoftoi agjencia shtetërore siriane e lajmeve SANA duke cituar burime ushtarake.
“Rreth orës tetë të mbrëmjes së sotme, Izraeli shënjestroi Aeroportin Ndërkombëtar të Aleppos me një sulm raketor, i cili shkaktoi dëme materiale.” – tha burimi ushtarak për SANA.
Shpërthime u regjistruan edhe në Damask, ku raportimet e dëshmitarëve okularë folën për dëme në zona të banuara dhe viktima të mundshme. Megjithatë, ende nuk ka një konfirmim zyrtar.
Sipas një raporti, të paktën tre raketa goditën pistën e aeroportit të Aleppos, duke e nxjerrë atë jashtë shërbimit deri në një njoftim të dytë.
Pjesa më e madhe e trafikut ajror të Sirisë u ridrejtua përmes Aleppos pasi një sulm i ngjashëm në qershor shkatërroi pistat në Aeroportin Ndërkombëtar të Damaskut. Fotot satelitore izraelite treguan dëme të konsiderueshme në aeroport. Zyrtarët sirianë informuan Rusinë se riparimi i pistave të dëmtuara mund të marrë ‘kohë të konsiderueshme’.
Izraeli e ka shënjestruar vazhdimisht Sirinë me raketa, të qëlluara zakonisht nga hapësira ajrore libaneze ose Lartësitë e pushtuara të Golanit.
Teherani i ka ofruar ndihmë ushtarake Damaskut në vitet e fundit kundër terroristëve të Shtetit Islamik (IS, dikur ISIS) dhe militantëve të tjerë radikalë. Izraeli pretendon se Irani po përdor fluturime civile në Siri për të kontrabanduar armë dhe pjesë raketash për Hezbollahun, një milici shiite në Liban.
