Ish-presidenti rus Dmitry Medvedev ka akuzuar SHBA-në dhe aleatët e saj të shtunën se po përpiqen të provokojnë shpërbërjen e Rusisë dhe paralajmëroi se përpjekje të tilla mund të çojnë në fund të botës.
Siç shkruan AP, zëvendëssekretari i Këshillit të Sigurimit të Rusisë e paralajmëroi Perëndimin se një përpjekje për ta shtyrë Rusinë drejt kolapsit do të ishte një “lojë shahu me vdekjen”.
Medvedev, i cili shërbeu si president i Rusisë në vitet 2008-2012 kur kufizimet e mandatit e detyruan Putinin të kalonte në postin e kryeministrit, u pa gjerësisht nga Perëndimi si më liberal se mentori i tij.
Megjithatë, muajt e fundit ai ka bërë komente që kanë tingëlluar shumë më të ashpra se ato të zyrtarëve më të ashpër të Kremlinit.
Pasi mori pjesë në ceremoninë e lamtumirës të së shtunës për ish-udhëheqësin sovjetik Mikhail Gorbachev, Medvedev publikoi një postim në kanalin e tij të aplikacionit të mesazheve, duke iu referuar rënies së Bashkimit Sovjetik në vitin 1991 dhe duke akuzuar SHBA-në dhe aleatët e saj se po përpiqeshin të krijonin shpërbërjen e Rusisë.
Medvedev pretendoi se disa në Perëndim do të donin të “përfitonin nga konflikti ushtarak në Ukrainë për ta shtyrë vendin tonë drejt një kthese të re shpërbërjeje, të bënin gjithçka për të paralizuar institucionet shtetërore të Rusisë dhe për t’i hequr vendit kontrollet efikase, siç ndodhi në vitin 1991.”
“Këto janë ëndrrat e pista të perversëve anglo-saksonë, të cilët shkojnë të flenë me një mendim të fshehtë për shpërbërjen e shtetit tonë, duke menduar se si të na bëjnë copa-copa, të na presin në copa të vogla.”- ka shkruar Medvedev sipas AP.
“Përpjekje të tilla janë shumë të rrezikshme dhe nuk duhen nënvlerësuar. Ata ëndërrimtarë shpërfillin një aksiomë të thjeshtë: një shpërbërje me forcë të një fuqie bërthamore është gjithmonë një lojë shahu me Vdekjen, në të cilën dihet saktësisht se kur vjen shahu mat: fundi i botës për njerëzimin.”
Medvedev përfundoi duke thënë se arsenalet bërthamore të Rusisë janë “garancia më e mirë për të mbrojtur Rusinë e Madhe”.
