Presidenti ukrainas, Vladimir Zelensky, ka urdhëruar një rishikim të legalizimit të pornografisë dhe erotikës. Masa vjen si përgjigje ndaj një peticioni që mblodhi 25,000 nënshkrimet e nevojshme që çështja të shqyrtohej nga autoritetet.
Duke komentuar nismën fundjavën e shkuar, Zelensky sinjalizoi se kishte ngarkuar kryeministrin Denis Shmigal ‘të përpunojë çështjen e ngritur në peticionin elektronik dhe të informojë autorin e tij për rezultatet e shqyrtimit’.
Zelensky vuri në dukje se Kushtetuta u jep qytetarëve ukrainas të drejtën e lirisë së mendimit, fjalës dhe shprehjes. Megjithatë, kjo dispozitë kufizohet, ndër të tjera, me një ligj për Mbrojtjen e Moralit Publik, i cili ndalon prodhimin dhe shpërndarjen e materialeve eksplicite.
Autori i peticionit, Taras Syromskyi, tha se legjislacioni ukrainas në këtë fushë ka shumë boshllëqe të cilat ‘i japin hapësirë interpretimit të tij’ veçanërisht në lidhje me atë se si përkufizohet në të vërtetë erotizmi.
“Legjislacioni nuk shpjegon mirë se ku është erotizmi në art dhe ku erotizmi është pornografi.” – shkruan ai. Autori tha gjithashtu se ndalimi i pornografisë mund të nxisë korrupsionin.
Në të njëjtën kohë, legalizimi i pornografisë paraqet ‘një mundësi ideale për të sjellë para në buxhetin e Ukrainës’, tha ai.
Përgjigja e Zelensky ndaj peticionit vjen pasi ai i kërkoi kryeministrit të konsideronte legalizimin e martesave të të njëjtit seks pas një peticioni tjetër muajin e kaluar.
Ai vuri në dukje në atë kohë, megjithatë, se dispozitat kushtetuese për martesën nuk mund të ndryshoheshin tani për tani për shkak të ligjit ushtarak të shpallur më 24 shkurt, në të njëjtën ditë që Rusia filloi ofensivën e saj ushtarake në vend.
