Mbretëresha Elizabeth II është vënë nën mbikëqyrjen mjekësore në Balmoral, pasi mjekët janë të shqetësuar për shëndetin e saj. Kështu ka njoftuar sot Buckingham Palace.
“Pas vlerësimit të mëtejshëm këtë mëngjes, mjekët e Mbretëreshës janë të shqetësuar për shëndetin e Madhërisë së Saj dhe kanë rekomanduar që ajo të mbetet nën mbikëqyrjen mjekësore.”– thuhet në deklaratë sipas BBC-së.
“Mbretëresha mbetet rehat dhe në Balmoral.”
I biri i saj princi Charles tani është me të, po ashtu edhe nipi Duka i Kembrixhit është rrugës për ta takuar.
Në Balmoral ka udhëtuar edhe Dukesha e Cornwall-it, Camille.
Njoftimi vjen pasi Mbretëresha 96 vjeçare, u tërhoq nga një takim virtual të mërkurën, pasi mjekët e këshilluan atë të pushonte.
Siç shkruan BBC, kryeministrja Liz Truss tha se “i gjithë vendi” është “thellësisht i shqetësuar” nga lajmet.
“Mendimet e mia – dhe mendimet e njerëzve në mbarë Mbretërinë tonë të Bashkuar – janë me Madhërinë e saj Mbretëreshën dhe familjen e saj në këtë kohë.”– shtoi ajo.
Vetëm dy ditë më parë, mbretëresha e emëroi zonjën Truss si kryeministre në Balmoral, në vend që të udhëtonte për në Londër për ngjarjen.
