Kafshë të ngordhura, banesa nën ujë dhe dëme të konsiderueshme në tokat bujqësore. Kështu është gdhirë Shkodra kët të shtunë, pasi gjatë natës është përfshirë nga një stuhi e fortë dhe reshje të dendura shiu.
Pedonalja në qendër të qytetit është përmbytur gjithashtu nga rrebeshi i shiut që zgjati për disa orë.
Disa fshatra të njësisë Rrethina, pjesë e bashkisë Shkodër kanë dhjetëra hektarë tokë të përmbytur ndërsa në disa raste ka edhe banesa që kanë pësuar dëme të ndryshme.
Banorët i kanë bërë thirrje shtetit që të pastrojë kanalet, që kanë vite pa u pastruar.
“Ka ardhur stuhia, 1 me e gjysmë ka këtu, ç’ka pasur Brenda në shtëpi i ka dëmtua, ka shembull avllinë, më ka marrë makinë, 30 vite nuk ka pastruar shteti kanalet, i kam marrë policinë më ka thënë nuk ka punëtor, s’mundem të vijë, kështu nuk i kemi pasur kurrë, e ka marrë makinë e ka spostuar 20 metra, apeli im është të pastrojë kanalet dhe ndihma.”- tha një banor i fshatit Bardhaj për Report Tv.
“Dëmet janë të mëdha. Ka prishë avllinë, ka faj shteti që s’ka pastruar kanalet. Në shpi ca ka pasur brenda ka shkuar dëm, 2 makinat e shtëpisë janë dëmtuar. Nja 30 familje janë dëmtuar, ka ndodhur edhe 2-3 herë të tjera, jo kaq shumë. Reagime s’ka pasur, apeli jonë është që të na punojë këto kanale, të reagojë, mos të rrijë duar kryq se kur janë votat vijnë.”- tha një tjetër.
Po ashtu në rrugën e zonës turistike të Shirokës pranë liqenit të Shkodrës gjatë natës ka pasur probleme me rrëshqitjet e dheut duke vështirësuar kështu qarkullimin rrugor.
Institucionet nga ana tjetër, bashkia Shkodër dhe Prefektura e Qarkut Shkodër pretendojnë se janë angazhuar që në orët e para të mëngjesit duke nisur punën për evidentimin e dëmeve të mundshme dhe normalizimin e situatës.
