Ministrja e Brendshme gjermane Nancy Faeser ka kërkuar që Rusia dhe Bjellorusia të ndalohen nga turneu i futbollit Euro 2024, sipas Der Spiegel. Revista raporton se zyrtarja i ka shkruar presidentit të UEFA-s, Aleksander Ceferin për këtë çështje.
Tre javë përpara shortit për grupet kualifikuese, që do mbahet në Frankfurt, letra thuhet se vë në dukje se si Rusia tashmë është e ndaluar nga garat ndërkombëtare dhe kërkon të njëjtin trajtim për aleatin e saj të ngushtë.
Faeser dyshohet se argumenton se Bjellorusia, e cila kurrë nuk është kualifikuar për një turne të madh dhe ka luajtur ndeshjet e saj në shtëpi të Ligës së Kombeve të UEFA-s në Serbi në qershor pa praninë e tifozëve, duhet të përjashtohet nga të gjitha ndeshjet dhe turnetë ndërkombëtare të futbollit për shkak se qeveria e saj është ‘mbështetëse thelbësore e udhëheqjes ruse’ në konfliktin e vazhdueshëm ushtarak në Ukrainë.
Për më tepër, politikania gjermane thuhet se shtoi se UEFA duhet gjithashtu të pezullojë zyrtarët rusë dhe bjellorusë nga ‘organet me ndikim të federatave sportive ndërkombëtare’.
Ndërkohë, revista The Athletic thotë se UEFA ka marrë tashmë korrespondencën dhe do përgjigjet në kohën e duhur.
Kërkesa e Faeser nga Gjermania pason një lëvizje të ngjashme nga presidenti i Federatës së Futbollit të Ukrainës (UAF) Andrey Pavelko, i cili ka kërkuar që Rusia të përjashtohet nga shorti i grupeve kualifikuese më 1 tetor.
Rusia duhet të jetë ‘plotësisht e izoluar në skenën ndërkombëtare, duke përfshirë edhe futbollin’, shkroi Pavelko në faqen zyrtare të shoqatës. UEFA dhe FIFA përjashtuan të gjitha ekipet ruse nga garat ndërkombëtare të futbollit në shkurt.
Kjo bëri që ekipi i meshkujve të Rusisë të nxirret jashtë garës për Kupën e Botës në Katar 2022 në nëntor dhe ekipi i femrave u largua nga faza e grupeve të Euro 2022. Në fillim të majit, UEFA më pas njoftoi se sanksionet e saj do të shtriheshin deri në sezonin 2022/23, por ende nuk ka bërë ndonjë deklaratë zyrtare nëse Rusia mund të marrë pjesë në ndeshjet kualifikuese të Euro 2024.
