Italia ka frikë se Franca mund të ndalojë eksportin e energjisë elektrike për shkak të rënies së prodhimit nga termocentralet bërthamore, raportoi të shtunën la Repubblica.
Sipas gazetës, autoritetet franceze të energjisë u shkruan homologëve të tyre italianë për t’i njoftuar ata për një ndërprerje të ardhshme dyvjeçare të furnizimit, me një zëdhënëse të Ministrisë Italiane të Energjisë që konfirmoi raportin.
Megjithatë, Bloomberg raportoi të dielën se Franca mohon planifikimin për të shkurtuar eksportet e energjisë në Itali.
“Franca rikonfirmon zotimin e saj për solidaritet reciprok në lidhje me gazin dhe energjinë elektrike me të gjithë fqinjët tanë evropianë. Ndërlidhjet elektrike plotësisht funksionale janë një prioritet për sigurinë e furnizimit kolektiv.” – tha në një deklaratë Ministria e Tranzicionit të Energjisë e Francës, sipas Bloomberg.
Në fillim të kësaj jave, firma shtetërore franceze e energjisë EDF tha se prodhimi i saj i energjisë bërthamore do binte në nivelin më të ulët në mbi 30 vjet për shkak të problemeve të mirëmbajtjes në termocentralet e vjetëruara.
Ndërkohë, operatori i rrjetit të vendit RTE paralajmëroi se mund t’i duhet të mbyllë ndërlidhësit e tij me Italinë dhe Britaninë në raportin e tij të perspektivës së dimrit. Një veprim i tillë do ndalonte në mënyrë efektive eksportet e energjisë.
Italia importon rreth 13% të energjisë elektrike të saj, tregojnë të dhënat nga operatori kombëtar Terna, me Francën që përbën rreth 5% të konsumit vjetor të vendit.
