Presidenti turk Rexhep Tajip Erdogan beson se lideri rus Vladimir Putin po kërkon t’i japë fund luftës që filloi në Ukrainë.
Siç shkruan BBC, Erdogan tha se përshtypja e tij nga bisedimet e fundit me Vladimir Putin ishte se lideri rus dëshironte “t’i jepte fund kësaj sa më shpejt të jetë e mundur”.
Udhëheqësi turk tregoi se gjërat ishin “mjaft problematike” për Rusinë. Erdogan foli me Putinin në një samit që u mbajt në Uzbekistan javën e kaluar.
Në një intervistë me transmetuesin amerikan PBS, udhëheqësi turk tha se nga ky takim krijoi përshtypjen se presidenti rus dëshironte një fund të shpejtë të luftës.
“Ai në fakt po më tregon se është i gatshëm t’i japë fund kësaj sa më shpejt të jetë e mundur.”- tha Erdogan, citon BBC. “Kjo ishte përshtypja ime, sepse mënyra se si po shkojnë gjërat tani është mjaft problematike.”
Ai tha gjithashtu se 200 pengje do të shkëmbehen së shpejti midis dy palëve, por nuk dha detaje të mëtejshme se kush do të përfshihej në një shkëmbim të tillë të burgosurish.
Erdogan ka kërkuar vazhdimisht të ndërmjetësojë gjatë luftës, duke promovuar një qëndrim “të balancuar” për Turqinë anëtare të NATO-s, ndërsa kundërshton sanksionet perëndimore ndaj Rusisë.
Presidenti turk ndihmoi OKB-në të ndërmjetësonte një rifillim të eksporteve të grurit nga Ukraina dhe tha javën e kaluar se po përpiqej të organizonte gjithashtu bisedime të drejtpërdrejta për armëpushim.
Ndërkohë, dy muaj pasi forcat ruse morën kontrollin mbi të gjithë rajonin lindor të Luhanskut, Ukraina ka rimarrë një pjesë të territorit.
