Konflikti midis Rusisë dhe Ukrainës ‘do përfundojë vetëm në tryezën e bisedimeve’, ka thënë presidenti francez Macron.
Macron bëri thirrje për një ‘paqe të negociuar’ mes fqinjëve gjatë një interviste të enjten me BFM TV në bordin e avionit të tij që po kthehej nga sesioni i Asamblesë së Përgjithshme të OKB-së në Nju Jork.
Ministri i Jashtëm rus Lavrov tha në fillim të këtij muaji se Moska ‘nuk e hodhi poshtë’ idenë e bisedimeve me Kievin, por paralajmëroi se sa më shumë që pala ukrainase t’i vononte ato, aq më e vështirë do ishte për të gjetur një bazë të përbashkët.
Duke folur për rolin perëndimor në konfliktin në Ukrainë, Macron këmbënguli se ‘detyra jonë është të mbajmë linjën tonë’. Dhe kjo linjë, sipas tij, ‘po ndihmon Kievin të mbrojë territorin e tij dhe të mos sulmojë kurrë Rusinë’.
“Ne nuk jemi në luftë me Rusinë.” – siguroi presidenti francez.
Presidenti rus Putin njoftoi një mobilizim të pjesshëm në Rusi të mërkurën, duke përmendur faktin se vendi ka luftuar ‘të gjithë makinën ushtarake perëndimore’ në Ukrainë. Sipas tij, Moska është e gatshme të ‘përdorë të gjitha mjetet në dispozicion’ për të mbrojtur popullin dhe territorin e saj.
Macron tha në përgjigje të deklaratave të Putinit se duke njoftuar një mobilizim të pjesshëm të rezervave të saj ushtarake, Rusia ka vendosur ‘të ndërmarrë një hap drejt përshkallëzimit’, duke u përpjekur gjithashtu të ‘shantazhojë’ Perëndimin me armë bërthamore.
Thirrja e rezervistëve në Rusi pason njoftimin e kësaj jave nga Republikat Popullore të Donetsk dhe Lugansk, dhe rajonet të Zaporozhye dhe Kherson, se ata do mbajnë referendume për bashkimin me Rusinë midis 23 dhe 27 shtatorit.
