Prodhuesit e ushqimeve të ngrira dhe të freskëta në Gjermani kanë paralajmëruar se rritja e çmimeve të energjisë së shpejti mund t’i detyrojë ata të ndalojnë operimet, sipas Die Welt.
“Ka boshllëqe të konsiderueshme të furnizimit në furnizimin ditor të ushqimit për njerëzit në Gjermani. Gjendja është më se serioze.” – thuhet në një letër të hapur nga industria.
“Kompanitë tani kanë frikë se linjat e prodhimit së shpejti do ndalojnë dhe se qendrat e logjistikës frigoriferike për shpërndarjen e ushqimit do mbyllen. Disa madje po përgatiten për falimentim të mundshëm.” – vijoi letra.
Letra u nis nga Instituti Gjerman i Ushqimit të Ngrirë dhe Shoqata e Kompanive Gjermane të Magazinimit të Ftohtë dhe Logjistikës, dhe u nënshkrua nga pesë grupe të tjera të industrisë. Ai iu drejtua kancelarit Olaf Scholz, ministrit Federal të Ekonomisë Robert Habeck dhe ministrit Federal për Ushqimin Cem Ozdemir.
Sipas autorëve të letrës, gjendja financiare e prodhuesve të ushqimit po përkeqësohet çdo ditë, gjë që së shpejti mund të rezultojë në një valë falimentesh në industri. Ata paralajmërojnë se nevojitet ndërhyrja e qeverisë për t’i shpëtuar. Në veçanti, ata po bëjnë thirrje për mbështetje financiare për prodhuesit e mesëm me energji intensive në zinxhirin e ngrirjes së thellë.
“Industria ushqimore aktualisht po përjeton krizën më të keqe që nga fundi i Luftës së Dytë Botërore. Veproni tani, përndryshe frigoriferët dhe ngrirësit së shpejti do boshatisen.” – thuhet në letër.
Gjermania, së bashku me BE-në më të gjerë, po përballet me një rritje të mprehtë të çmimeve të energjisë dhe një rritje rekord të inflacionit në mes të intensifikimit të sanksioneve antiruse dhe një politike të braktisjes së karburantit rus.
