Britania do rrisë ndjeshëm shpenzimet e saj ushtarake në vitet e ardhshme, ka zbuluar Sekretari i Mbrojtjes Ben Wallace, pavarësisht faktit se kombi po përballet me një krizë ekonomike që rrjedh nga masat Covid-19 dhe sanksionet e Londrës ndaj Moskës.
Në një intervistë me Sunday Telegraph të botuar të dielën, Wallace tha se qeveria britanike do shpenzojë të paktën 52 miliardë stërlina (56.5 miliardë dollarë) për të mbështetur ushtrinë. Planet janë në përputhje me premtimin e fushatës së kryeministres Liz Truss për të rritur shpenzimet e mbrojtjes.
Sipas zyrtarit, buxheti vjetor i mbrojtjes i Britanisë do arrijë në 100 miliardë stërlina deri në vitin 2030.
Wallace gjithashtu sulmoi ish-Kancelarin e Thesarit Rishi Sunak dhe Thesarin për atë që ai e përshkroi si një ‘sulm korporativ’ kundër forcave të armatosura që filloi në vitet 1990.
Wallace shprehu besimin, megjithatë, se pasardhësi i Sunak në zyrë, Kwasi Kwarteng, do tregonte më shumë mirëkuptim ndaj nevojave të ushtrisë.
Sekretari i Mbrojtjes, i cili mbajti postin e tij pasi Liz Truss mposhti Sunak në garën për t’u bërë kryeministre në fillim të shtatorit, tha se gatishmëria e lideres së re për të shpenzuar më shumë për ushtrinë ishte një nga faktorët kryesorë për të në vendosjen se cili kandidat do zgjidhje në krye të qeverisë dhe Konservatorëve.
Duke iu drejtuar udhëheqësve botërorë në Asamblenë e Përgjithshme të OKB-së në Nju Jork, Truss përsëriti zotimin e saj të fushatës për të shpenzuar 3% të PBB-së për mbrojtjen deri në vitin 2030.
Sipas Bloomberg, kryeministrja përmbysi planet e ish-kryeministrit Boris Johnson për të zvogëluar ushtrinë me 9,500 personel.
