Deputetja e Partisë së Lirisë, Erisa Xhixho ngre shqetësimin për largimin e të rinjve dhe situatën që kanë shkaktuar në universitete, ku auditoret kanë më pak studentë.
Në një deklaratë për mediat, Xhixho u shpreh se arsimi është lënë pas dore për vite të tëra.
Duke iu referuar shifrave të publikuara nga Qendra Shqiptare për Gazetari Cilësore, që sipas saj “nxjerrin ne pah fakte tronditese per arsimin universitar”, Xhixho tha se në prag të vitit të ri akademik, kemi 50 mijë studentë më pak se 8 vite më parë.
“Tregu kaotik i punës, pa qëndrueshmëri dhe pa politika orientimi për të rinjtë, nuk zgjon interesin e studenteve. Mundësitë e pakta të punësimit, pagat e ulëta dhe mosfinancimi i kërkimit shkencor nuk kënaqin ambicien e më të mirëve, të cilët Europa po na i merr përditë.”- thotë Xhixho.
Sipas deputetes së PL-së, arsimi duhet të kthehet në prioritet kombëtar dhe si e vetmja mënyrë për të luftuar sot boshatisjen e shkollave dhe universiteteve, kemi nevojë për vendimmarrje të forta.
Deklarata e plotë e deputetes
Te nderuar qytetare,
Ajo që po ndodh në universitetet e vendit është alarmante.
Gjithnjë e më pak studentë ulen në auditore, sepse çdo ditë këtij vendi i ikin të rinj.
Shifrat e publikuara nga Qendra Shqiptare për Gazetari Cilësore nxjerrin ne pah fakte tronditese per arsimin universitar
- Në prag të vitit të ri akademik, kemi 50 mijë studentë më pak se 8 vite më parë.
Ndërkohë në 5 vjeçarin e fundit vihet re një rënie e numrit të studentëve me rreth 8 mijë studentë pak të regjistruar.
- Degët e shpallura prioritare nga qeveria nuk po zgjojnë asnjë interes. Pavarësisht incentivave, ka degë që rrezikojnë të mbyllen.
- Interesi për disa degë e bën akoma më të zymtë parashikimin për të ardhmen. Studentë që regjistrohen në degë si anglishtja dhe gjermanishtja janë të rinj që planifikojnë të ikin sapo të mbyllin studimet.
- Në universitetet e rretheve, gjendja është akoma më trishtuese. Në asnjë prej tyre nuk është plotësuar të paktën gjysma e kuotave.
Universiteti “Eqerem Çabej” i Gjirokastrës, i ndjekur nga Universiteti “Fan S. Noli” në Korçë dhe “Aleksandër Xhuvani” në Elbasan, shënojnë numrin më të ulët të regjistrimeve në raundin e parë të aplikimeve.
Një pjesë e programeve mësimore në këto universitete ende nuk plotësojnë një numër minimal prej 5 studentësh të regjistruar për degë.
1- Universiteti i Gjirokastrës
Universiteti i Gjirokastrës ka plotësuar vetëm 32% të kuotave.
Degët e mësuesisë kanë një numër të papërfillshëm regjistrimesh, ku kryeson Gjuha dhe Letërsia Shqipe me vetëm 1 regjistrim, e ndjekur nga Histori-Gjeografia me 2 regjistrime dhe Biologji-Kimia me 3 regjistrime.
Në këtë universitet, dega më e preferuar rezulton të jetë Infermieria e Përgjithshme .
2- Universiteti i Korcës
Universiteti “Fan S. Noli” në Korçë ka plotësuar deri tani vetëm 37% të kuotave. Degët me më pak kërkesa janë ato të mësuesisë, me vetëm me 3-6 regjistrime .Më keq është matematikë-fizika që nuk ka asnjë regjistrim.
3-Universiteti i Elbasanit
Në raundin e parë janë regjistruar 924 studentë nga 2386 kuota në total. Degët më problematike figurojnë ato të mësuesisë, me 1-5 studentë për degë.
4-Universiteti i Shkodrës
Në universitetin “Luigj Gurakuqi” në Shkodër janë plotësuar rreth 45% e kuotave.
Arsimi është lënë pasdore për vite të tëra.
Pseudoreformat e qeverisë “Rama” e kanë çuar në një rrugë pa krye.
Tregu kaotik i punës, pa qëndrueshmëri dhe pa politika orientimi për të rinjtë, nuk zgjon interesin e studenteve. Mundësitë e pakta të punësimit, pagat e ulëta dhe mosfinancimi i kërkimit shkencor nuk kënaqin ambicien e më të mirëve, të cilët Europa po na i merr përditë.
Kjo qeveri nuk po e sheh zhvillimin te arsimi, por te krimi.
Arsimi duhet të kthehet në prioritet kombëtar.
Është e vetmja mënyrë për të luftuar sot boshatisjen e shkollave dhe universiteteve , kemi nevoje per vendimarrje te forta dhe te pergjegjshme sot pasi neser do te jete vone!
