Në daljen e sotme për mediet, kryeministri Edi Rama u pyet nga gazetarët për zëvendësimin e Arben Ahmetaj me Blendi Klosin si drejtues qarku politik i Vlorës.
Pyetja që iu drejtua Ramës ishte nëse ky vendim i tij paralajmëron ndonjë hetim të Ahmetajt për inceneratorët apo një shpallje në nongrata, sikurse aludohetnë disa medie.
Rama tha se vendimi ishte thjesht për organizimin e skuadrës.
“Këto janë ato përrallat, ju jeni në të drejtën tuaj të tregoni përralla duke përkuar pas çdo vendimi dhe hapi qëllime që nuk ekzistojnë. Kjo është diçka që nuk do ndodhte 10 vite më parë, por ndodh kudo dhe në botë, në emër të lirisë së medias jepet e drejta për të spekuluar deri në ekstrem dhe për kërdisur popullin me lloj lloj shpifjesh e gënjeshtrash, që vijnë nga qëllimi për të shpifur e për të bërë lajme, zoti i paftë të gjithë dhe u kujdestë për të gjitha, e vërteta e ka të vështirë të çajë në këto botë, njerëzit që i qëndrojnë besnik të vërtetat të tyre e kanë të vështirë të jetojnë lehtësisht. Ne jemi në të drejtën tonë të bëjmë ndryshime, i kemi bërë gjithmonë njerëzit janë aty lëvizin, E drejta juaj, kush jam unë në fund të fundit.”- tha Rama.
Gazetarja këmbënguli duke pyetur se ku gaboi Ahmetaj. Por Rama këmbënguli se “Se si organizohet një skuadër është e drejta e skuadrës jo e tifozëve dhe spektatorëve. Pse duhet të jetë bërë diçka që të lëvizë nga një pozicion, do bëjmë edhe të tjera. Do shikojmë sipas nevojës së kësaj ndeshje, bëhet për zgjedhjet vendore ky largim.”
