Turmat e protestuesve u përpoqën të sulmonin ambasadën franceze në kryeqytetin Ouagadougou të Burkina Fasos të shtunën, pasi forcat speciale organizuan grushtin e dytë ushtarak brenda një viti. Protestuesit akuzuan ish-fuqinë koloniale se ndihmuan udhëheqësit e rrëzuar, nënKolonelit Paul Henri Sandaogo Damiba, vendndodhja e të cilit mbetet e panjohur.
“Damiba është përpjekur të tërhiqet në bazën ushtarake franceze Kamboinsin për të përgatitur një kundërofensivë në mënyrë që të nxisë përçarje midis forcave tona të mbrojtjes dhe sigurisë.” – njoftoi zëdhënësi Lejtnant Jean Baptiste Kabre në televizionin shtetëror të shtunën në emër të udhëheqjes së re të juntës.
Ministria e Jashtme e Francës lëshoi një deklaratë duke mohuar çdo përfshirje në ngjarjet që po shpalosen në Burkina Faso dhe këmbënguli se ‘kampi ku janë vendosur forcat franceze nuk e ka pritur kurrë Paul Henri Sandaogo Damiba dhe as ambasada jonë’.
Autoritetet franceze këshilluan qytetarët të qëndrojnë në shtëpi, pasi turma njerëzish të zemëruar u mblodhën jashtë rrethimit të Ambasadës Franceze pasditen e së shtunës. Sipas videove të shpërndara në mediat sociale, protestuesit u përpoqën të sulmonin kompleksin diplomatik, e qëlluan me gurë dhe vunë zjarr në hyrje dhe rreth perimetrit të objektit.
Thuhet se turmat e zemëruara vandalizuan edhe Institutin Francez në qytetin e dytë më të madh të Burkina Faso, Bobo-Dioulasso.
Të premten, një fraksion i ushtrisë së Burkina Fasos mori pushtetin në Ouagadougou. Kapiteni Ibrahim Traore ka zëvendësuar nënkolonelin Paul-Henri Damiba në krye të juntës ushtarake.
Vendndodhja e Damibas mbetet e panjohur dhe ai ende nuk ka dhënë dorëheqjen zyrtarisht, pasi udhëheqja e re e juntës pretendoi se nuk po kërkonin hakmarrje ndaj liderit të rrëzuar.
Damiba, i cili ishte arsimuar në Francë, udhëhoqi grushtin e shtetit të 24 janarit që rrëzoi presidentin Roch Marc Christian Kabore. Në atë kohë, ai premtoi të rivendoste demokracinë dhe paqen, por që atëherë është akuzuar se ka dështuar ta bëjë këtë.
Burkina Faso ka një popullsi prej rreth 20 milionë banorësh dhe është pa dalje në det midis Malit dhe Nigerit në veri, dhe Beninit, Togos, Ganës dhe Bregut të Fildishtë në jug. Së bashku me fqinjët e saj veriorë, ajo është prekur nga kryengritja e militantëve aleatë me grupet terroriste të Al-Kaedës ose ISIS-it.
