Vendet evropiane mund të përballen me një dimër më të ftohtë se zakonisht, parashikoi të dielën shefja e Qendrës Evropiane për Parashikimet e Motit (ECMWF).
Ky parashikim vjen pasi kontinenti po lufton me një krizë energjie pas sanksioneve që Perëndimi ka vendosur ndaj Rusisë pas sulmit të kësaj të fundit ndaj Ukrainës.
Duke folur për Financial Times, Drejtoresha e Përgjithshme e ECMWF Florence Rabier tha se të dhënat e hershme sugjerojnë se në nëntor dhe dhjetor Evropa Perëndimore mund të përballet me një periudhë presioni të lartë. Kjo, vuri në dukje ajo, mund të sjellë mot më të ftohtë me më pak erë dhe reshje shiu, të cilat mund të zvogëlojnë sasinë e energjisë së prodhuar nga burimet e rinovueshme të energjisë.
Shefja e ECMWF vijoi duke thënë se ndërsa në një periudhë afatshkurtër Evropa mund të përjetojë mot më të butë për shkak të uraganeve të fundit në Atlantik, një dukuri atmosferike e quajtur La Nina mund të sjellë mot më të ftohtë më vonë. Kjo zakonisht ndodh për shkak të ftohjes periodike të Oqeanit Paqësor, i cili shkakton efekte valëzuese në mot në të gjithë globin dhe mund të ndryshojë modelet e erës dhe të reshjeve.
Rabier vuri në dukje se Evropa sapo përjetoi një nga verat e saj më të nxehta në histori. Ndërsa kjo rezultoi të ishte një përfitim për energjinë diellore, ajo gjithashtu çoi në një ulje të pjesës së energjisë së erës dhe hidrocentraleve të BE-së.
Zyrtarë të ndryshëm perëndimorë dhe figura publike kanë paralajmëruar për gjendjen e dëshpëruar në të cilën BE-ja mund ta gjejë veten këtë dimër. Të enjten, themeluesi i Microsoft, Bill Gates pohoi se pas disa muajsh kontinenti mund të përballet me një ‘gjendje shumë të frikshme’, pasi shumë njerëz mund të mos jenë në gjendje të ngrohin shtëpitë e tyre.
Në fund të shtatorit, komisionerja e BE-së për Energjinë Kadri Simson parashikoi gjithashtu se ky dimër ‘nuk do jetë i lehtë’, por duke shtuar se dimri i ardhshëm ‘do jetë edhe më i vështirë’.
Në muajt e fundit, Brukseli është zhytur nga një krizë energjetike e nxitur nga rritja e çmimeve të gazit për shkak të sanksioneve që Perëndimi vendosi ndaj Rusisë pas sulmit të Moskës ndaj Ukrainës. Për të lehtësuar gjendjen, BE-ja miratoi të premten një paketë masash emergjente. Zyrtarët kanë nxitur gjithashtu konsumatorët që të kursejnë energjinë me të gjitha mjetet në dispozicion.
