Të paktën 83 persona kanë humbur jetën pas uraganit Ian, që përfshiu shtetin amerikan të Floridës këtë javë, sipas një raporti të dielën.
Stuhia tropikale solli përmbytje dhe shkatërrim në Floridën jugperëndimore, duke prekur më së shumti Fort Myers, Fort Myers Beach dhe Cape Coral.
Në Karolinën e Veriut, pati katër vdekje të lidhura me stuhinë për shkak të Ian.
Përpjekjet e ekipeve të kërkim-shpëtimit vazhdojnë pasi stuhia shkatërruese e kategorisë 4 arriti në tokë të mërkurën.
Presidenti Joe Biden tha të enjten se uragani Ian ‘mund të jetë më vdekjeprurësi’ në historinë e shtetit.
“Ky mund të jetë uragani më vdekjeprurës në historinë e Floridës. Shifrat janë ende të paqarta, por ne po dëgjojmë raporte të hershme dhe bëhet fjalë për një numër të konsiderueshëm të jetëve njerëzore të humbura.” – tha Biden nga selia e Agjencisë Federale të Menaxhimit të Emergjencave (FEMA).
