Kancelari austriak Karl Nehammer deklaroi të hënën se sistemi i azilit i Bashkimit Evropian ka dështuar, pasi vendi i tij pa një rekord prej 56,000 kërkesash për refugjatë këtë vit. Së bashku me Viktor Orban të Hungarisë dhe Aleksandar Vuçiç të Serbisë, Nehammer propozoi forcimin e sigurisë kufitare.
“Austria është shumë e ngarkuar nga emigrimi i paligjshëm. Kontributi i solidaritetit që ne po japim në Evropë është në mënyrë disproporcionale i lartë.” – tha Nehammer në një samit me Orban dhe Vuçiç në Budapest, sipas gazetës austriake Kronen Zeitung.
“Politika e azilit ka dështuar. Nuk ka ende një mbrojtje të fortë të kufirit të jashtëm të BE-së dhe realiteti i problemit po shpërfillet.” – shtoi kancelari austriak.
Sipas programit ‘Solidariteti Efektiv’ i BE-së, shtetet anëtare më të pasura nxiten të pranojnë emigrantët e refuzuar nga kombet e tjera që luftojnë për të përballuar fluksin. Nëse këto vende të pasura refuzojnë, anëtarëve të tjerë u kërkohet të marrin atë që Komisioni Evropian e quan ‘pjesën e tyre të drejtë’ të emigrantëve.
Rreth 56,149 kërkesa për azil u depozituan në Austri midis janarit dhe gushtit të këtij viti, sipas Ministrisë së Brendshme të vendit. Kjo paraqet një rritje prej 195% krahasuar me të njëjtën periudhë të vitit të kaluar.
Ministria vuri në dukje se shumica e aplikimeve janë bërë nga shtetas indianë, të cilët nuk kanë asnjë mundësi për t’u dhënë realisht azil për shkak të mbërritjes së tyre nga një vend i sigurt.
Pakistanezët, marokenët dhe tunizianët janë gjithashtu në mesin e atyre që kërkojnë azil, me shumë gjasa që rastet e tyre të refuzohen.
“Për sa kohë që BE nuk ndërhyn me masa efikase, ne do të duhet të ndihmojmë veten.” – tha Nehammer të hënën.
“Prandaj Austria po bën gjithçka që është e mundur për të mbrojtur veten dhe ne duam të marrim masa të mëtejshme së bashku me Serbinë dhe Hungarinë. Sepse nëse mbrohet kufiri serb dhe ai hungarez, mbrohet edhe kufiri ynë.” – theksoi ai.
Austria ka përdorur ushtrinë e saj për të vendosur kontrolle kufitare në disa raste që kur miliona emigrantë filluan të derdheshin në Evropë në vitin 2015 dhe vitin e kaluar vendosi 400 ushtarë shtesë në kufirin e saj me Hungarinë.
Orban ka marrë një qëndrim edhe më të ashpër dhe ka ndërtuar një gardh me dy shtresa përgjatë kufijve të tij me Kroacinë dhe Serbinë, ndërkohë që ka dëbuar menjëherë emigrantët që konsiderohen të papranueshëm. Beogradi refuzon shumicën e kërkesave për azil.
