Qeveria italiane ka forcuar mbikëqyrjen dhe kontrollet mbi energjinë nënujore dhe kabllot e telekomunikacionit në brigjet e saj, tha një burim i afërt me çështjen për Reuters.
Vendimi vjen si përgjigje ndaj shpërthimeve që u zbuluan në fund të shtatorit në tubacionet e gazit Nord Stream 1 dhe 2, që lidhin Rusinë me BE-në përmes Gjermanisë, tha burimi.
Javën e kaluar, Reuters raportoi gjithashtu se Italia kishte rritur mbikëqyrjen e tubacioneve që sjellin gaz në vend nga jugu dhe lindja.
Sipas dy zyrtarëve të lartë, të cilët biseduan me agjencinë, masat e sigurisë u rritën në gazsjellësin TransMed, i cili lidh Algjerinë me Siçilinë, Gazsjellësin Trans Adriatik (TAP), që shkon nga Azerbajxhani në Pulia, dhe lidhja GreenStream, midis Libisë dhe Siçilisë.
Autoritetet daneze raportuan rrjedhje në Nord Stream 1 dhe 2 më 26 shtator pasi operatori përjetoi humbje të presionit mbi tubacionet. Autoritetet daneze dhe suedeze më vonë thanë se një seri shpërthimesh nënujore ishin zbuluar pranë ishullit Bornholm në Detin Baltik.
Incidenti konsiderohet gjerësisht si rezultat i sabotazhit. Disa zyrtarë perëndimorë pretenduan se ishte Rusia ajo që hodhi në erë tubacionet e veta, ndërsa Moska e ka drejtuar gishtin nga SHBA-ja si fajtori i mundshëm.
Javën e kaluar, Sekretari Amerikan i Shtetit, Antony Blinken i quajti shpërthimet një ‘mundësi të jashtëzakonshme’ për të hequr BE-në nga energjia ruse, ndërsa mburrej se SHBA-të po bëhen ‘furnizuesi kryesor i gazit natyror të lëngshëm në Evropë’.
