Kryeministrja britanike Liz Truss e përshkroi veten si një ‘sioniste e madhe’ dhe ‘mbështetëse e madhe e Izraelit’ gjatë një takimi me një grup parlamentar pro-izraelit konservator.
Truss ishte një e ftuar nderi në ngjarjen e Miqve Konservatorë të Izraelit (CFI) gjatë konferencës vjetore të Partisë Konservatore në Birmingham, në të cilën ajo po merrte pjesë për herë të parë në cilësinë e saj të re. Duke folur me një turmë në periferi të takimit, ajo deklaroi angazhimin e saj të palëkundur ndaj kauzës izraelite, sipas pamjeve të deklaratave të saj të publikuara në mediat sociale.
“Siç e dini, unë jam një sioniste e madhe, unë jam një mbështetëse e madhe e Izraelit dhe e di se ne mund ta forcojmë marrëdhënien Britani-Izrael.” – u tha ajo të pranishmëve brohoritës.
Vetë CFI u përqendrua në një pjesë të fjalimit të saj, në të cilin ajo iu referua ‘kërcënimeve nga regjimet autoritare që nuk besojnë në liri dhe demokraci’, kundër të cilave ‘dy demokracitë e lira, Britania e Madhe dhe Izraeli, duhet të qëndrojnë krah për krah’.
Pozicioni i Truss-it ndaj Izraelit është i mirënjohur dhe ajo e promovoi atë gjatë fushatës së saj për t’u bërë udhëheqësja dhe kryeministre e re konservatore. Ndër ndryshimet e politikës që ajo u zotua të zbatonte në detyrë ishte rishikimi i zhvendosjes së ambasadës së vendit të saj nga Tel Avivi në Jeruzalem. Ish-presidenti amerikan Donald Trump bëri të njëjtën gjë gjatë qëndrimit të tij në Shtëpinë e Bardhë.
Kryeministrja britanike bëri të njëjtin premtim muajin e kaluar, gjatë një takimi me homologun e saj izraelit Yair Lapid në margjinat e Asamblesë së Përgjithshme të OKB-së në Nju Jork. Grupet pro-palestineze dhe udhëheqja palestineze e kanë dënuar këtë ide.
