Presidenti i Ugandës Yoweri Museveni u ka kërkuar “falje” qytetarëve të Kenias, pasi djali i tij i cili është një oficer i lartë ushtarak, kërcënoi në Twitter për pushtimin e vendit të tyre.
Ndjesa e tij erdhi një ditë pasi ai e shkarkoi të birin Muhoozi Kainerugaba nga detyra si komandant i forcave tokësore të ushtrisë.
Por siç shkruan BBC, presidenti Museveni më pas e ngriti të birin në gradën e gjeneralit dhe duke e mbajtur si këshilltar të tij.
Museveni prej kohësh është dyshuar se po kujdeset që i biri 48-vjeçar, ta pasojë atë në detyrë kur ai përfundimisht të largohet.
Gjenerali Kainerugaba ka hyrë gjithnjë e më shumë në arenën politike, me kritikët e tij që thonë se kjo ishte në kundërshtim me kodin e disiplinës së ushtrisë.
Ndërhyrja e tij e fundit erdhi të hënën kur ai bëri një sërë postimesh në Twitter – disa serioze, disa me shaka për Kenian.
Ai tha se kishte folur me ish-presidentin e Kenias Uhuru Kenyatta dhe shprehu keqardhjen që kishte dhënë dorëheqjen në fund të dy mandateve të tij në gusht.
“Problemi im i vetëm me vëllain tim të madh të dashur është se ai nuk qëndroi për një mandat të tretë. Ne do të kishim fituar lehtësisht!”– tha gjenerali Kainerugaba.
Në një postim të mëvonshëm për më shumë se 600 mijë ndjekësit e tij, ai tha: “Nuk do të na duheshin neve, ushtrisë sime dhe mua, as 2 javë për të kapur Nairobin (kryeqytetin e Kenias)”.
Kjo çoi në një zhurmë në Twitter, me njerëz që akuzuan gjeneralin Kainerugaba si “të pamatur” dhe se po rrezikonte marrëdhëniet midis shteteve fqinje.
Kjo bëri që ai t’u kërkonte qytetarëve të Kenias të “relaksoheshin”.
“Unë kurrë nuk do ta rrihja ushtrinë keniane sepse babai im më ka thënë të mos e provoja kurrë! Kështu që njerëzit tanë në Kenia duhet të relaksohen!”- shkroi gjenerali Kainerugaba.
Megjithëse qeveria keniane nuk komentoi, ministria e jashtme e Ugandës nxori një deklaratë duke thënë se Uganda vlerësonte “marrëdhëniet e forta dypalëshe” me “fqinjin vëllazëror“.
Në përpjekjen e fundit për të qetësuar situatën, Museveni tha se kishte folur me presidentin e Kenias, William Ruto, dhe se i vinte “shumë keq” për postimet e djalit të tij në Twitter.
“U kërkoj vëllezërve dhe motrave tona keniane të na falin për postimet e dërguara nga gjenerali Muhoozi, ish-komandant i Forcave Tokësore këtu, në lidhje me çështjet zgjedhore në atë vend të madh.
Nuk është korrekte që zyrtarët publikë, qofshin ata civilë apo ushtarakë, të komentojnë apo të ndërhyjnë në çfarëdo mënyre, në punët e brendshme të vendeve vëllazërore.”– tha Museveni.
Ai shtoi se pavarësisht “gabimit” të djalit të tij, ai e kishte ngritur atë në gradën e gjeneralit të plotë, sepse ai mund të jepte ende “shumë kontribute pozitive”.
“Unë e di me të vërtetë se gjeneral Muhoozi është një pan-afrikanist i pasionuar.”– tha Museveni.
Djali i tij njihet për postimet e diskutueshme në Twitter, duke përfshirë mbështetjen për pushtimin rus të Ukrainës dhe rebelët Tigrayan që luftojnë qeverinë etiopiane.
Ai gjithashtu shkroi në Twitter se do t’i jepte 100 bagëti kryeministres së ardhshme të ekstremit të djathtë të Italisë, Giorgia Meloni. Kjo pasi e konsideronte “të patrembur dhe të vërtetë”.
“E di që evropianët u japin vajzave që u pëlqejnë lule? Nuk e kam kuptuar kurrë. Në kulturën tonë ju i jepni një vajze që pëlqeni një lopë.“- shtoi ai.
