Prokuroria e Tiranës ka refuzuar padinë e kreut të Partisë së Lirisë, Ilir Meta ndaj Autoritetit të Dosjeve, duke vendosur mos fillimin e procedimit penal.
Sipas prokurorisë ekzistojnë rrethana të cilat nuk lejojnë regjistrimin e padisë së ish presidentit.
“Gjatë kësaj periudhe janë kryer verifikimet përkatëse që parashikon ligji procedural penal dhe që lidhen në rastin konkret me marrjen e deklarimeve përkatëse në cilësinë e personave që tregojnë rrethana të hetimit, të antarëve të AIDSSH-së ndaj të cilëve drejtohet ky kallëzim penal. Kallëzuesi ka paraqitur pretendimin e tij mbi rastin konkret, ashtu sikurse të kallëzuarit kanë parashtruar procedurën e ndjekur në një rast të tillë, por dhe procedurën që duhej të ndiqte kallëzuesi në një rast të tillë, ndonëse nga kallëzuesi është çmuar se veprimet e antarve të AIDSSH-së janë kryer në kundërshtim me ligjin. Në vlerësimin tonë, nisur nga çka përmban kallëzimi penal nr.11409 viti 2022 dhe për më tepër baza ligjore mbi të cilën ka operuar Autoriteti për Informim mbi Dokumentet e Ish-Sigurimit të Shtetit (AIDSSH), bën të mosgjendemi para rrethanave për regjistrimin e procedimit penal, që lidhet me ekzistencën e figurës apo figurave të veprës apo veprave penale. Pra, ekzistojnë rrethana që nuk lejojnë fillimin e procedimit penal, rrethana këto të parashikuara nga neni 290/1 germa “ç“ të K.Pr.Penale. Sa më sipër, në mbështetje të nenit 291/1/2 të K.Pr.Penale, më datë 21.09.2022 është vendosur mosfillim i procedimit penal.”-njofton Prokuroria.
Meta paditi më 1 shtator Autoritetin e Dosjeve pasi sipas tij, ka shkelur 6 nene të Kodit Penal, dhe i akuzoi për shpërdorim detyre, falsifikim i dokumenteve shtetërore, falsifikim kompjuterik, falsifikim i vulave, i stampave ose i formularëve, përhapja e informatave të rreme që ngjallin panik, zbulim të akteve ose të dhënave sekrete.
