Papa Françesku bëri një mbrojtje të zjarrtë të emigrantëve të dielën, duke e quajtur përjashtimin e tyre ‘skandaloz, të neveritshëm dhe mëkatar’, duke e vënë atë në një kurs përplasjeje me qeverinë e ardhshme të krahut të djathtë të Italisë.
Papa i bëri komentet teksa shpalli shenjtor një peshkop të shekullit të 19-të të njohur si ‘babai i emigrantëve’ dhe një burrë i shekullit të 20-të që u shërbeu të sëmurëve në Argjentinë.
Papa që e ka bërë mbështetjen e emigrantëve një temë kryesore të pontifikatit të tij, kryesoi ceremoninë para 50,000 njerëzve në Sheshin e Shën Pjetrit.
“Përjashtimi i emigrantëve është skandaloz. Në të vërtetë, përjashtimi i emigrantëve është kriminal. Kjo i bën ata të vdesin para nesh.” – tha ai.
“Dhe kështu sot Mesdheu është varreza më e madhe në botë.” – tha ai, duke iu referuar mijërave që janë mbytur duke u përpjekur të arrijnë në Evropë.
“Përjashtimi i emigrantëve është i neveritshëm, është mëkat. Është kriminale të mos hapësh dyert për ata që janë në nevojë.” – tha ai.
Giorgia Meloni pritet të bëhet kryeministre në fund të këtij muaji në krye të një koalicioni të krahut të djathtë që është zotuar të godasë emigracionin dhe të shtrëngojë kufijtë e Italisë.
Ajo ka premtuar riatdhesime të përshpejtuara dhe rregulla më të rrepta për azilin. Meloni ka bërë thirrje gjithashtu për një bllokadë detare të Afrikës së Veriut për të parandaluar lundrimin e emigrantëve.
