Gati 30% e pikave të karburantit në Francë vuajnë nga mungesa e karburantit për shkak të mbylljes së rafinerive të shkaktuara nga grevat në rafineritë e ‘TotalEnergies’ dhe ‘ExxonMobil Esso France’, raportoi Reuters të dielën duke cituar zyrën e ministrit të Energjisë.
Tre nga gjashtë rafineritë janë tani për tani të mbyllura dhe mediat franceze raportojnë radhë të mëdha në pikat e karburantit në të gjithë vendin.
Sipas France 24, prodhimi i brendshëm i karburantit të vendit ka rënë me më shumë se 60% gjatë gati dy javëve greva, e barasvlefshme me 740,000 fuçi karburant në ditë.
Punëtorët, të cilët vuajnë nga kriza e kostos së jetesës, ndërkohë që çmimet e larta të energjisë sjellin fitime të mëdha për kompanitë e energjisë në të cilat punojnë, po kërkojnë një rritje page.
Në tremujorin e dytë të 2022, TotalEnergies regjistroi 5.7 miliardë dollarë fitim kundrejt 2.2 miliardë dollarëve në të njëjtën periudhë të vitit 2021.
Sindikata franceze e punëtorëve CGT ka kërkuar një taksë mbi këto fitime dhe një rritje të pagave 10%, me 7% për të luftuar inflacionin dhe 3% si ‘ndarje fitimi’.
TotalEnergies të dielën ofroi të çonte përpara bisedimet për pagat për të qetësuar punonjësit dhe për t’i bindur ata të heqin bllokadën ndaj rafinerive.
‘Esso France’, e cila ka debatuar për një rritje pagash me punonjësit e saj për javë të tëra, tha se do të zhvillojë një raund të ri bisedimesh më vonë të hënën ‘me synimin për të mundësuar rafineritë e grupit të rifillojnë funksionimin sa më shpejt të jetë e mundur’.
Në një përpjekje për të lehtësuar tregun e brendshëm të karburantit, Franca lëshoi rezervat strategjike dhe rriti importet, tha ministrja e Energjisë Agnes Pannier-Runacher në një deklaratë në BFM TV të dielën.
Ajo gjithashtu përshëndeti vendimet e dy firmave të energjisë për të përshpejtuar diskutimet e pagave ‘në mënyrë që populli francez të mos merret peng nga kjo mosmarrëveshje sociale dhe të mund të shkojë në punë me besim’.
Përfaqësuesit e sindikatës i thanë Reuters se grevat do të vazhdojnë derisa të plotësohen kërkesat e punëtorëve.
