Rusia ka shtuar “Meta”-n, kompaninë pronare të “Facebook”-ut në listën e saj të organizatave ekstremiste dhe terroriste. Kështu raportoi Interfax këtë të martë.
Sipas këtij raporti, Rosfinmonitoring, shërbimi federal i monitorimit financiar të Rusisë, ishte pas lëvizjes.
Vendimi do të thotë se të gjitha shërbimet e ofruara nga “Meta”, duke përfshirë edhe “WhatsApp” dhe “Instagram”, do të ndërpriten në vend dhe rusët do të humbnin aksesin në këto platforma.
Vesna, lëvizja ruse kundër luftës, u vu gjithashtu në listën e organizatave të përfshira në terrorizëm dhe ekstremizëm të martën.
Në mars, rregullatori rus i teknologjisë bllokoi aksesin në “Facebook”, duke e akuzuar atë për “diskriminim” dhe duke thënë se platforma e mediave sociale kishte kufizuar aksesin e përdoruesve në mediat e lajmeve të mbështetura nga qeveria si Sputnik dhe Russia Today.
Më vonë gjatë muajit, Zyra e Prokurorit të Përgjithshëm të Rusisë kërkoi që “Meta” të etiketohej si një “organizatë ekstremiste”.
Sipas një raporti të Reuters që citonte disa emaile të brendshme të kompanisë, “Meta” lejoi përkohësisht postimet që bënin thirrje për dhunë kundër pushtuesve rusë nga përdoruesit në disa vende si Ukraina dhe Polonia.
Një gjykatë e shpalli kompaninë fajtore për “veprimtari ekstremiste” në Rusi.
