Ukraina është një anëtare ‘de facto’ e aleancës së NATO-s, pavarësisht se nuk i është bashkuar zyrtarisht bllokut ushtarak të udhëhequr nga SHBA-ja, tha ministri i Mbrojtjes, Aleksey Reznikov.
Ai e bëri deklaratën në një postim në Twitter pas një takimi me Sekretarin e Përgjithshëm të NATO-s Jens Stoltenberg në selinë e bllokut në Bruksel.
“Ne kemi bërë një rrugë të gjatë dhe i jemi bashkuar ‘de facto’ aleancës.” – shkroi ministri, ndërsa falënderoi gjithashtu Stoltenberg për mbështetjen e tij për Ukrainën në mes të konfliktit të saj të vazhdueshëm me Rusinë.
“Ukraina po jep tashmë një kontribut të rëndësishëm për sigurinë e botës së lire.” – shtoi ministri.
Reznikov shprehu gjithashtu besimin se fitorja mbi Moskën dhe ‘reformat e suksesshme’ brenda vendit do ‘hapnin horizonte të reja’ për vendin e tij.
Më 30 shtator, presidenti ukrainas Zelensky paraqiti një kërkesë për t’u anëtarësuar në NATO dhe bëri thirrje për një procedurë të përshpejtuar pranimi për vendin e tij.
Megjithatë Stoltenberg ka vënë në dukje se ‘çdo vendim për anëtarësimin duhet të merret me konsensus’ nga të 30 anëtarët e NATO-s dhe se prioriteti kryesor i saj tani është të ‘mbështesë Ukrainën’ ushtarakisht dhe financiarisht gjatë konfliktit.
Një deklaratë në mbështetje të kërkesës së Kievit për pranim të shpejtë është mbështetur deri tani nga nëntë shtete anëtare – Republika Çeke, Estonia, Letonia, Lituania, Maqedonia e Veriut, Mali i Zi, Polonia, Rumania dhe Sllovakia.
