Kriza energjetike ka arritur edhe në skenën kulturore. Hamburger Bahnhof në Berlin, shtëpia për artin bashkëkohor të Nationalgalerie, tani po dërgon një sinjal. Muzeu ka fikur dritat e neonit të përdorura për instalimin e dritës “Untitled” nga artisti amerikan Dan Flavin, i cili ka zbukuruar fasadën e ndërtesës që kur u hap në 1996.
Siç shkruan media gjermane “Die Welt”, tubat e neonit blu në shtyllat midis harqeve me dritë jeshile të fasadës neoklasike kanë qenë tipari dallues i muzeut që atëherë.
“Është e rëndësishme që ne, si një muze i njohur ndërkombëtarisht, të japim një shembull në situatën aktuale dhe të japim kontributin tonë në kursimin e burimeve të pakta.”– tha Till Fellrath, drejtor i muzeut Hamburger Bahnhof së bashku me Sam Bardaouil, duke shpjeguar fushatën. “Shpresojmë që ky hap, i vështirë për ne, të stimulojë gjithashtu një rimendim të përgjithshëm të planifikimit të qëndrueshëm të muzeve.”-shtoi ai.
Flavin kishte projektuar tubat me dritë fluoreshente veçanërisht për fasadën dhe krahët anësorë historikë të muzeut. Sipas muzeut, instalimi është fikur për herë të parë që nga themelimi i shtëpisë. Ndërprerja e energjisë për veprën e artit pritet të zgjasë gjatë dimrit deri në fund të marsit.
