Imran Khan, ish-kryeministrit të Pakistanit, i është ndaluar të kandidojë në zgjedhje duke e penguar të bëhet deputet për pesë vitet e ardhshme. Vendimi i komisionit zgjedhor u hodh poshtë nga partia e tij, e cila ka bërë thirrje për protesta në rrugë në përgjigje të asaj që ata thonë se është një akt i njëanshmërisë politike.
Komisioni Zgjedhor i Pakistanit (ECP) akuzoi Khan se nuk raportoi siç duhet se si qeveria e tij trajtoi dhuratat që ai kishte marrë gjatë kohës që ishte në detyrë. Ajo përbënte ‘praktika korruptive’ që garantonin skualifikimin e tij nga mbajtja e posteve publike, njoftoi organi të premten.
Zyrtarë të lartë në partinë e Pakistanit Tehreek-e-Insaf (PTI) të Khanit e kundërshtuan vendimin dhe thanë se do e kundërshtonin atë në gjykatë.
Fawad Chaudhry, i cili ishte ministër i Ligjit nën Khan, e quajti vendimin një ‘shuplakë në fytyrën e 220 milionë’ mbështetësve të partisë dhe pretendoi se vendimi ishte ‘i shkruar nga Nawaz Sharif dhe i nënshkruar nga shërbëtorët e tij’. Ai e kishte fjalën për ish-kryeministrin pakistanez, i cili është edhe vëllai i kreut të tanishëm të qeverisë, Shehbaz Sharif.
Raportime për protesta dhe disa përleshje në rrugë midis mbështetësve të PTI-së dhe policisë kanë ardhur nga disa qytete, duke përfshirë kryeqytetin Islamabad, Lahore, Peshawar dhe Karaçi. Në autostradën Lahore-Islamabad, njerëzit dogjën goma, sipas videove të shpërndara në mediat sociale.
Në kryeqytet, policia u duk se përdori gaz lotsjellës për të shpërndarë demonstruesit. Pamjet nga vendi i ngjarjes treguan re të bardha të dendura që shpërthyen në rrugë, me njerëz që po largoheshin.
Qeveria pakistaneze e quajti vendimin një ekzekutim të duhur të drejtësisë dhe tha se Khan mund të ndiqet penalisht për korrupsion. Ministri i ligjit Azam Nazeer Tarar akuzoi gjithashtu udhëheqjen e PTI për nxitjen e ‘turmave’ për të sulmuar qytetet pakistaneze.
Khan u hoq nga posti i kryeministrit në gusht në një votë mosbesimi në parlament. Ai pretendoi se ishte një grusht shteti i orkestruar nga Uashingtoni për të vendosur një politikan në shërbim të tij në krye të vendit. Si Shehbaz Sharif ashtu edhe qeveria amerikane i mohuan akuzat.
Rasti i shqyrtuar nga ECP lidhej me katër dhurata nga vende të huaja, të cilat Khan pranoi se i kishte marrë. Në përgjigjen e tij zyrtare për komisionin muajin e kaluar, ai këmbënguli se ia kishte paguar vlerën e tyre thesarit kur i mori.
Disa zyrtarë të lartë të qeverisë në Pakistan janë ligjërisht të detyruar të deklarojnë të gjitha dhuratat, por lejohen t’i mbajnë ato nën një vlerë të caktuar. Artikujt më të shtrenjtë duhet të shkojnë në një zyrë speciale të quajtur Toshakhana, por në disa raste, marrësi mund t’i blejë ato me rreth gjysmën e vlerës së tyre.
