Bernard Arnault, pronari i markës së mallrave luksoze Louis Vuitton, i tha radios franceze ‘Classique’ se kishte shitur avionin e tij privat.
“Grupi Moët Hennessy Louis Vuitton (LVMH) kishte një aeroplan dhe ne e shitëm atë. Rezultati tani është se askush nuk mund të shohë se ku shkoj, sepse tani i marr me qira aeroplanët.” – tha Arnault për mediat.
Lëvizja erdhi pasi Twitter u përmbyt me llogari të tilla si ‘i_fly_Bernard’ dhe ‘laviondebernard’, të cilat gjurmuan avionin privat të Arnault dhe raportuan për gjurmën e tij të karbonit ose ndotjen atmosferike që shkaktoi.
Avioni, një Bombardier Global 7500 i prodhuar në Kanada, thuhet se është avioni më i madh i biznesit aktualisht në treg.
Sipas Reuters, çmimi i një avionic Bombardier 7500 të ri fillon në 73 milionë dollarë. Marrja me qira e një të tilli kushton rreth 10,650 dollarë në orë, sipas faqes së internetit ‘Paramount Business Jet’.
Raportet e mediave thonë se Arnault përdorte avionin e tij mjaft shpesh. Një raport i vitit 2019 nga Forbes pretendonte se ai udhëtonte me aeroplan privat të paktën një herë në muaj.
Pasuria neto e Arnault arrin në afërsisht 134 miliardë dollarë, gjë që e bën atë njeriun e tretë më të pasur në botë pas Jeff Bezos të Amazon dhe themeluesit të Tesla e SpaceX, Elon Musk, sipas Indeksit të Miliarderëve të Bloomberg.
Musk gjithashtu ka një numër ‘ndjekësish’ në Twitter që ndjekin dhe shqyrtojnë udhëtimet e tij. Vitin e kaluar, një student amerikan krijoi llogarinë në Twitter ‘ElonJet’ për të gjurmuar avionin privat të Musk duke përdorur informacione të disponueshme publikisht të trafikut ajror.
Sipërmarrësi i ofroi adoleshentit 5000 dollarë për të mbyllur llogarinë. Në vend të kësaj të rinjtë kërkuan 50 mijë dollarë, të cilave Musk nuk iu përgjigj.
