Presidenti turk Erdogan ka propozuar një referendum për të drejtën e grave për të mbajtur shami në shërbimin civil, shkolla dhe universitete.
“Nëse keni guximin, ejani, le ta vendosim këtë çështje në një referendum. Le ta marrë vendimin kombi.” – tha presidenti në parlament të shtunën, në një fjalim drejtuar liderit të opozitës Kemal Kilicdaroglu.
Kilicdaroglu kishte propozuar një ligj që u garantonte grave të drejtën për të mbajtur shami në ndërtesa publike, në një përpjekje për të siguruar votuesit myslimanë se partia e tij laike do mbronte të drejtat e tyre fetare, raportoi AFP. Thirrja e Erdoganit për një referendum ka të ngjarë të jetë një përpjekje për të fituar mbështetjen e votuesve mes besimtarëve përpara zgjedhjeve të vitit të ardhshëm.
Ndërsa Kilicdaroglu dikur mbështeti ndalimin e shamive, Erdogan e ka pozicionuar veten prej kohësh si një luftëtar kundër politikave të tilla laike.
Turqia ka qenë një shtet laik që nga viti 1924, megjithëse shamitë islame nuk ishin të ndaluara zyrtarisht në institucionet publike deri në fund të viteve 1990. Megjithëse Gjykata Kushtetuese e vendit rrëzoi një përpjekje të partisë qeverisëse AK të Erdoganit për të hequr ndalimin e shamisë në vitin 2008, presidenti turk arriti t’i japë fund kufizimit në 2013.
Edhe pse asnjë parti politike në Turqi nuk po propozon një rikthim të ndalimit, përfshirja e së drejtës për të mbajtur shaminë në Kushtetutë do të përfaqësonte një hap të rëndësishëm larg nga laicizmi i dekadave të mëparshme.
