Zgjedhjet e ardhshme vendore do të mbahen më 14 Maj 2023. Kjo është data që ka caktuar presidenti i Republikës, Bajram Begaj.
“Presidenti i Republikës, Sh.T.Z. Bajram Begaj, caktoi 14 majin 2023 si datën e zhvillimit të zgjedhjeve vendore të ardhshme.
Presidenti e vlerëson periudhën deri në zgjedhje si shumë të rëndësishme për përmbylljen me sukses të kësaj sfide demokracie për institucionet, partitë politike dhe gjithë shoqërinë shqiptare, si dhe thekson se është koha për të demonstruar përkushtim dhe bashkëpunim institucional, pjekuri politike dhe përgjegjshmëri qytetare.”- ka njoftuar sot Presidenca.
Përfundimi i mandatit të kryebashkiakëve në detyrë është 27 korriku, datë kur KQZ, 4 vite më parë, shpalli zyrtarisht rezultatin e zgjedhjeve vendoreve të vitit 2019.
Presidenti Begaj ka kërkuar nga Komisioni i Reformës Zgjedhore të përshpejtojë punën dhe të zbatojë rekomandimet e raportit të OSBE/ODIHR-it. Po ashtu u bën thirrjë partive politike që të shkojnë në këto zgjedhje me alternativa politike serioze e konkurruese.
Njoftimi i plotë
Presidenti i Republikës, Sh.T.Z. Bajram Begaj, caktoi 14 majin 2023 si datën e zhvillimit të zgjedhjeve vendore të ardhshme.
Presidenti e vlerëson periudhën deri në zgjedhje si shumë të rëndësishme për përmbylljen me sukses të kësaj sfide demokracie për institucionet, partitë politike dhe gjithë shoqërinë shqiptare, si dhe thekson se është koha për të demonstruar përkushtim dhe bashkëpunim institucional, pjekuri politike dhe përgjegjshmëri qytetare.
Presidenti Begaj nxit të gjitha palët që të shkojnë drejt kësaj date me përulësi dhe respekt ndaj qytetarëve dhe kundërshtarëve politikë.
Kreu i Shtetit i fton votuesit të mos anashkalojnë detyrën qytetare të mirë-informimit mbi alternativat politike dhe ushtrimit të të drejtës së votës, të pandikuar nga interesa, që cënojnë votën dhe vullnetin e lirë.
Ndër të tjera, Presidenti Begaj nënvizon se Komisioni i Reformës Zgjedhore ka detyrimin të përshpejtojë punën dhe të adresojë në kohë të gjitha çështjet e dala nga rekomandimet e raportit të OSBE/ODIHR-it.
Me këtë rast, Presidenti Begaj vlerëson nevojën e vendosjes së normalitetit politik në pushtetin vendor dhe u bën thirrje partive politike që të shkojnë në këto zgjedhje me alternativa politike serioze e konkurruese, që kanë në qendër të vëmendjes qytetarin dhe standardet më të mira demokratike.
