SPAK ka sekuestruar dy call center-a në Tiranë pasi akuzohen se mashtronin shtetas nga vende të huaja si Holanda, Italia e Gjermania.
Sipas njoftimit të prokurorisë janë arrestuar tre persona ndërsa për skemën e mashtrimit janë përdorur kontaktet e rreth 90 mijë personave ndërsa dëmi i shkaktuar kap vlerën e dhjetëra milionë eurove.
Operacioni i SPAK vjen pas një hetimi të gjatë të drejtësisë italiane, që ka sekuestruar në territorin e saj serverin e përdorur nga grupi për të shmangur gjurmët e penguar hetimet.
Njoftimi
“SPAK në bashkëpunim me autoritetet italiane kanë sekuestruar 2 Call Centera të cilat mashtronin shtetas nga vende të ndryshme të botës, si Italia Hollanda e Gjermania. Si pasojë e këtij operacioni janë arrestuar 3 persona e janë shpallur në kërkim edhe pesë të tjerë. Në lidhje me ngjarjen pritet që SPAK të mbajë një konferencë për mediat në orën 10:30. Mediat italiane raportojnë se gjatë mashtrimeve janë përdorur kontaktet e rreth 90 mijë personave dhe dëmi ekonomik prek vlerën e dhjetëra milionë eurove.
Skema veçanërisht komplekse kriminale bazohej në pastrimin e shumave të vjedhura në vende të ndryshme anëtare të BE-së, duke përfshirë Qipron, Lituaninë, Estoninë, Holandën dhe Gjermaninë, dhe shndërrimin e tyre në kriptovaluta. Masat paraprake dhe urdhrat e kontrollit u kryen ndaj shtetasve shqiptarë, të gjithë banues në Tiranë dhe pjesë e një organizate, e cila, sipas vlerësimeve, mund të ketë mashtruar disa qindra shtetas italianë.
Në rrjedhën e më shumë se 42,000 përgjimeve telefonike të kryera nga hetuesit italianë, rezultoi se mashtruesit ishin të aftë në përdorimin e teknikave të bindjes dhe plagjiaturës, deri në pikën e bindjes së viktimave për të hyrë në borxhe dhe për të paguar, me kalimin e kohës, disa qindra mijëra euro.
Vetëm pas analizës së sistemeve kompjuterike të sekuestruara do të mund të përcaktohen shumat reale të mashtrimeve të kryera. Rreth 1 Terabajt trafik telematik që kalonte përmes serverit u analizua gjatë operacioneve të përgjimit telematik. Në Tiranë u sekuestruan dy call centera. Në të njëjtën kohë në Itali u sekuestrua serveri i përdorur nga grupi për të errësuar gjurmët kompjuterike dhe për të penguar hetimet.”
