Gjermania ka rënë dakord të legalizojë zotërimin e furnizimin e sasive të vogla të marijuanës në një ‘kornizë të licencuar dhe të kontrolluar nga shteti’, zbuloi ministri gjerman i Shëndetësisë Karl Lauterbach në një konferencë për shtyp të mërkurën.
Sipas planit të kabinetit federal, bizneset e licencuara do lejohen të prodhojnë kanabis në vend, për t’u shitur në dyqane dhe farmaci të autorizuara. Të rriturit mund të mbajnë midis 20 dhe 30 gram material bimor të tharë për furnizimin e tyre.
Të rinjtë nën 21 vjeç nuk do ndalohen të blejnë kanabis, por mund të kufizoheshin në produkte me fuqi më të ulët, sugjeroi ministri, duke vënë në dukje se politika ekzistuese e drogës kishte dështuar të ‘siguronte’ mbrojtjen e të rinjve.
“Tendenca është në drejtimin e gabuar dhe ne gjithashtu kemi një treg të zi në lulëzim, i cili sigurisht vjen me kriminalitet të shtuar.” – vuri në dukje Lauterbach. Synimi është që tregu ligjor dhe i tatueshëm të minojë tregun e zi duke ofruar çmime konkurruese me forcë dhe cilësi të krahasueshme, me këtë të fundit të rregulluar nga Berlini. Megjithatë, qeveria nuk planifikon të vendosë vetë çmimet dhe nuk ka vendosur nëse duhet të aplikohet një ‘taksë kanabisi’ e veçantë mbi taksën e shitjeve.
Reklamimi i kanabisit do ndalohet dhe paketimi duhet të jetë ‘asnjanës’, ndërsa dyqanet që shesin drogën duhet të jenë të vendosura larg shkollave dhe nuk mund të shesin gjithashtu alkool apo duhan. Konsumimi i kanabisit aty ku shitet nuk ka gjasa të lejohet, megjithëse Lauterbach tha se qeveria ende po e shqyrtonte këtë pyetje.
Ndërsa ai nuk dha një afat kohor se kur gjermanët do mund të blejnë kanabis në farmacitë e tyre lokale, Lauterbach vlerësoi se legalizimi mund të hyjë në fuqi deri në vitin 2024. Për të ecur përpara kërkohet miratimi nga komisioni ekzekutiv i BE-së, pranoi ai.
Nëse i jepet drita jeshile, tha ai, shembulli gjerman ‘mund të jetë një model për Evropën’, duke zëvendësuar rrëmujën ekzistuese të kufizimeve shpesh kontradiktore dhe të zbatuara në mënyrë selektive. Lauterbach theksoi se nuk donte që Gjermania të ndiqte shembullin e Holandës, ku tregu ligjor nuk është shumë i rregulluar. Qeveria do rishqyrtojë ‘efektet sociale’ të legalizimit katër vjet më vonë.
Rreth katër milionë gjermanë raportuan se kishin përdorur kanabis vitin e kaluar, tha Lauterbach, me një të katërtën e atyre midis 18 dhe 24 vjeç që e kishin provuar atë. Kanabisi mjekësor ka qenë i ligjshëm për shitje dhe përdorim në vend që nga viti 2016.
