Rusia do të forcojë ligjin kundër promovimit të të ashtuquajturës “propagandë homoseksuale”. Siç shkruan BBC, do ashpërsohet ligji ekzistues i vitit 2013, i cili e bën vepër penale dhënien e informacionit mbi LGBT-të për fëmijët.
Të dënuarit përballen me gjoba të mëdha për promovimin e asaj që Rusia i quan “marrëdhënie seksuale jo tradicionale”.
Miratimi fillestar i zgjatjes u votua nga Duma Shtetërore Ruse në mënyrë unanime.
Në fillim të kësaj jave, zyrtarët rusë u kishin kërkuar politikanëve në dhomën e ulët të parlamentit të Rusisë që të miratonin zgjerimin e ligjit, duke e portretizuar atë si pjesë të një beteje më të gjerë mbi vlerat civilizuese me Perëndimin dhe duke e lidhur atë me vendimin për të pushtuar Ukrainën.
Sipas propozimit, informacioni rreth “mënyrave jotradicionale të jetesës” ose “refuzimit të vlerave familjare” do të konsiderohej ligjërisht i njëjtë me pornografinë, promovimin e dhunës ose nxitjen e tensioneve racore, etnike dhe fetare.
Ai gjithashtu ndalon “propagandën e pedofilisë” – të cilën qeveria ruse shpesh e ngatërron me të qenit homoseksual.
Një element tjetër i shtesave ndalon informacionin që mund të “shkaktojë tek të miturit dëshirën për të ndryshuar seksin”, një referencë për njerëzit transgjinorë.
Nëse miratohet, ligji do të lejojë që çdo informacion në internet që diskuton tema LGBT të bllokohet dhe filmat që mendohet se përmbajnë përshkrime pozitive të të qenit homoseksual të ndalohen.
Aktivistët e të drejtave të njeriut dhe grupet LGBT thonë se zgjerimi i ligjit do të thotë se çdo veprim ose përmendje publike e çifteve të të njëjtit seks është duke u kriminalizuar funksionalisht.
Ndalimi shtrihet gjithashtu tek reklamat dhe librat – duke ngritur shqetësime për censurën nga botuesit, të cilët kanë paralajmëruar për rrezikun që mund të prekë edhe klasikët e letërsisë ruse. Ligji parashikon gjoba midis 50 mijë rubla (705 £; 815 dollarë) dhe 400 mijë rubla, ndërsa jo-rusët që shkelin ligjin përballen me dëbimin nga vendi.
