Kancelari gjerman Olaf Scholz ka hedhur poshtë kërkesën e Greqisë që Berlini të paguajë qindra miliarda euro dëmshpërblime për pushtimin nazist të vendit gjatë Luftës së Dytë Botërore, duke deklaruar se çështja është ‘e mbyllur ligjërisht dhe politikisht’ në një koment për mediat vendase të enjten.
Kryeministri grek Kyriakos Mitsotakis nuk u pajtua, megjithatë, duke këmbëngulur gjatë një takimi mes dyshes se çështja ‘nuk ishte zgjidhur ende’. Ministria greke e Financave beson se Gjermania i detyrohet të paktën 269 miliardë euro – një pjesë e të cilave përbën shlyerjen e një kredie që Greqia u detyrua t’i jepte Reichsbank-ut gjerman, ndërsa ishte nën okupim në vitin 1942.
Ministri i Jashtëm grek Nikos Dendias zbuloi në fillim të këtij muaji se çështja e dëmshpërblimeve ‘mbetet e hapur’ si për qeverinë ashtu edhe për shoqërinë greke, duke e quajtur atë ‘një çështje parimi’.
Zyrtarët grekë janë takuar me homologët e tyre serbë dhe turq për të hartuar një propozim, që do t’i paraqitet Këshillit të Evropës, mbi dëmshpërblimet e kohës së luftës për vendet e Evropës Lindore që deri më tani nuk kanë qenë në gjendje të sigurojnë atë që ata besojnë se është kompensimi i duhur për krimet e Gjermanisë naziste.
Greqia është përpjekur të sigurojë shlyerjen e huasë së detyruar që nga viti 1945, duke u kundërshtuar çdo herë nga Gjermania. Nazistët pushtuan Greqinë në vitin 1941 dhe qëndruan atje deri në vitin 1944, duke lënë të vdekur dhjetëra mijëra civilë grekë, sipas disa vlerësimeve.
Gjermania ka paguar dhjetëra miliarda euro dëmshpërblime për Izraelin dhe Poloninë që nga fundi i Luftës së Dytë Botërore. Polonia i kërkoi Gjermanisë pak javë më parë dëmshpërblime të tjera në masën 1.3 trilionë euro por Berlini deklaroi se çështja ishte e mbyllur, duke argumentuar se Polonia kishte hequr dorë nga pretendimi i saj për pagesa të mëtejshme në vitin 1953.
