Tre aktivistë të ndryshimeve klimatike të grupit ‘Just Stop Oil’ janë arrestuar për ‘dhunë publike’ pasi sulmuan pikturën e famshme të Vermeer-it ‘Vajza me vathë perle’ në muzeun Mauritshuis në Hagë të enjten. Vepra artistike e paçmuar thuhet se është e padëmtuar.
Një video e incidentit e postuar në mediat sociale tregon një protestues duke derdhur një kanaçe me supë me domate mbi kokën e një tjetri përpara se të dy të heqin xhaketat e tyre për të zbuluar bluzat e zbukuruara me sloganin ‘Just Stop Oil’. Njëri nga protestuesit më pas ngjit kokën në panelin e xhamit që mbron sipërfaqen e pikturës, ndërsa tjetri ngjit dorën në murin ngjitur me pikturën.
Sipas Maritshuis, një protestues i tretë gjithashtu hodhi një ‘lëndë të panjohur’ në pikturë.
“Si ndiheni kur shihni diçka të bukur dhe të paçmuar duke u shkatërruar para syve tuaj?” – pyeti një nga demonstruesit turmën që ndodhej aty, duke e cilësuar zemërimin e tyre si ‘të mirë’ ndërsa pyeti: “Si ndiheni kur shihni planetin duke u shkatërruar para syve tanë?”
“Si ndiheni kur shihni planetin duke u shkatërruar para syve tanë?”
Muzeu siguroi publikun se piktura ‘nuk ishte dëmtuar’ dhe do kthehej për t’u ekspozuar ‘sa më shpejt të jetë e mundur’, duke deklaruar se ‘arti është i pambrojtur dhe së e dënonte me forcë përpjekjen për dëmtimin e tij në çdo formë’.
Sulmi është i fundit në një seri sulmesh ndaj veprave klasike të artit nga ‘Just Stop Oil’ dhe grupe të ngjashme. Dy aktivistë të tjerë të ‘Just Stop Oil’ u arrestuan në Galerinë Kombëtare në fillim të këtij muaji për dëmtim kriminal dhe shkelje të rëndë pasi sulmuan ‘Sunflowers’ të Van Gogh me një kanaçe supë, ndërsa një grup aktivistësh nga ‘Letzte Generation’ (Brezi i Fundit) shpërfytyruan ‘Les Meules’ të Monet me pure patatesh të konservuara dhe u ngjitën në dysheme në muzeun Barberini në Gjermani.
Demonstruesit kanë përdorur gjithashtu bojë llak dhe mbetje njerëzore në përpjekjet e tyre për të tërhequr vëmendjen ndaj sjelljeve të njerëzimit që sipas tyre rrezikojnë klimën, megjithëse pritja e ftohtë që ata kanë marrë nga publiku ka disa pikëpyetje nëse ata po dëmtojnë kauzën që pretendojnë se mbrojnë.
