Arabia Saudite ka paralajmëruar zyrtarët e inteligjencës amerikane për një sulm të afërt në territorin e saj nga Irani, raportoi të martën Wall Street Journal. Ndërkohë që nuk u zbuluan hollësi të inteligjencës në fjalë nga gazeta, forcat amerikane, saudite dhe aleate në Lindjen e Mesme thuhet se janë vendosur në gatishmëri të lartë.
Irani synon të sulmojë si vetë Mbretërinë Saudite ashtu edhe qytetin irakian të Erbilit, ku janë vendosur trupat amerikane, u thanë zyrtarët homologëve të tyre amerikanë, sipas WSJ.
Më vonë të martën, Sekretari i Shtypit i Pentagonit, Patrick Ryder u tha gazetarëve se SHBA-ja ishte ‘e shqetësuar për kërcënimin’ dhe rezervoi ‘të drejtën për të mbrojtur veten e aleatët’. Ashtu si Wall Street Journal, Ryder nuk ofroi hollësi të mëtejshme të kërcënimit të supozuar.
Forcat iraniane kanë goditur Erbilin në disa raste këtë vit, duke lëshuar një duzinë raketash balistike ndaj qytetit në mars dhe duke lëshuar më shumë raketa dhe drone që nga fundi i shtatorit. Teherani tha se sulmet e fundit kishin për qëllim ‘grupet terroriste’ kurde që vepronin pranë qytetit irakian.
Irani ka akuzuar fuqitë e huaja, veçanërisht SHBA-në, Izraelin dhe Arabinë Saudite, se kanë nxitur një valë demonstratash antiqeveritare në të gjithë vendin javët e fundit. Komandanti i Korpusit të Gardës Revolucionare Islamike të Iranit, gjenerali Hossein Salami, akuzoi publikisht Riadin muajin e kaluar për ‘ndërhyrje në punët e brendshme’ përmes mbulimit mediatik të protestave.
