Presidenti i Ukrainës, Volodymyr Zelensky, ka akuzuar Kremlinin se po i drejtohet “terrorizmit energjetik” pasi trupat ruse kanë pak përfitime në fushën e betejës.
Zelensky tha se 4.5 milionë njerëz në Ukrainë kishin mbetur pa energji elektrike pas sulmeve ruse në rrjetin e saj energjetik.
Siç shkruan BBC, në javët e fundit, Rusia ka kryer sulme në shkallë të gjerë me raketa dhe drone në objektet e energjisë ukrainase.
Sulmet vijnë pasi zyrtarët thonë se trupat ruse ka të ngjarë të tërhiqen nga qyteti kyç jugor Kherson.
Pasi pësoi një seri humbjesh të dhimbshme në fushën e betejës, Rusia ka shtuar sulmet në javët e fundit ndaj infrastrukturës së energjisë elektrike në qytete larg vijave të frontit.
Vetëm në muajin e fundit, një e treta e termocentraleve të vendit thuhet se janë shkatërruar, sipas Presidentit Zelensky.
Si rezultat, qeveria ukrainase është detyruar të nxisë popullsinë të përpiqet të përdorë energjinë me kursim.
“Rreth 4.5 milionë konsumatorë janë shkëputur përkohësisht nga konsumi i energjisë.”– tha Presidenti Zelensky në fjalimin e tij mbrëmjen e së enjtes.
Ai tha se shënjestrimi i infrastrukturës energjetike nga Rusia ishte një shenjë “dobësie” pasi forcat ruse nuk arrijnë të bëjnë shumë terren në vijën e frontit.
“Vetë fakti që Rusia po i drejtohet terrorizmit energjetik tregon dobësinë e armikut tonë.”– tha ai.
“Ata nuk mund ta mposhtin Ukrainën në fushën e betejës, kështu që ata përpiqen të thyejnë njerëzit tanë në këtë mënyrë.”
Ministria e Mbrojtjes e Rusisë e ka konfirmuar se po synon infrastrukturën energjetike të Ukrainës. Akuza e Zelensky vjen pas disa raporteve se trupat ruse po largohen nga qyteti i pushtuar i Khersonit, duke sinjalizuar një tërheqje të madhe për Rusinë.
Një zyrtar i instaluar nga Rusia në rajonin e Khersonit, Kirill Stremousov, u tha mediave ruse se Moska “ka të ngjarë” të tërheqë trupat e saj nga zona.
Dhe sipas një zyrtari perëndimor, duke folur në kushte anonimiteti, shumica e oficerëve komandues rusë tashmë janë tërhequr nga qyteti.
Në vend që të përpiqeshin të mbanin kontrollin e qytetit, ata thanë se trupat ruse po ndërtonin pozicionet e tyre mbrojtëse në anën tjetër të lumit Dnipro, si pjesë e një lëvizjeje më të gjerë ruse për të vendosur linja më të mira mbrojtëse në të gjithë Ukrainën jugore dhe lindore përpara mbërritjes së dimrit.
Është e vështirë të dihet se çfarë po ndodh saktësisht brenda qytetit, por zyrtari tha se rezervistët e mobilizuar rusë ishin dërguar në qytet për të mbuluar tërheqjen përfundimtare kur të ndodhë.
Përveç kësaj, korrespondenti i BBC-së për çështjet ndërkombëtare, Paul Adams, thotë se bankat thuhet se janë boshatisur dhe muzetë janë plaçkitur.
