Shtyhet përsëri seanca lidhur me padinë e ngritur nga deputetja demokrate Albana Vokshi ndaj ministres së Arsimit Evis Kushi.
Në një deklaratë për mediat, Vokshi u shpreh se shtyrjen e kërkoi organi i akuzës pasi kishin “një trajnim tjetër”.
Deputetja u bëri thirrje mësuesve dhe prindërve të protestojnë për të shpërtuar të ardhmen e fëmijëve të tyre, pasi sipas saj arsimi është në rrezik.
“Erdha përsëri personalisht në gjykatë, në respekt të kohës dhe të investimit edhe të parave të kësaj gjykate për një padi që në fakt nuk ka çështje brenda.
Denoncimi që unë kam bërë për nxjerrjen e testeve nga ana e kabinetit të ministres Kushi, duke jua dhënë atyre militantëve, është bërë tashmë katërcipërisht i vërtetuar. Për fat të keq edhe sot seanca nuk u krye.
Për herë të dytë është pikërisht organi i akuzës i cili kërkon shtyrje, sepse me çfarë u informuam në seancë prokurorët kanë një trajnim tjetër.
Është shtyrë për në datë 22, përsëri do vazhdoj të jem vetë prezente edhe në seancën e fundit për t’i qëndruar deri në fund denoncimeve që unë kam bërë. Pse? Sepse unë vazhdoj mendoj, vazhdoj shpresoj që çdo njeri sot ka arsye për të protestuar. Për të potestuar sepse arsimi është në nivelin më të ulët. Sepse 600 shkolla janë mbyllur dhe me urdhër të Ramës shkolla të tjera po mbyllen.
Pse? Sepse dhjetëra, mijëra fëmijë mësojnë në klasa kolektive. Rreth 100 mijë fëmijë mësojnë me 2 apo 3 turne. Sot arsimi në Shqipëri është në rrezik, ndaj duhet të rezistojmë, duhet të denoncojmë, duhet të reagojmë, duhet të protestojmë.
Ndaj thirrja ime sot është për të gjithë prindërit që të protestojnë. Thirrja ime sot është për të gjithë mësuesit që të protestojnë. Pse? Sepse arsimi duhet shpëtuar. Ndaj në 12 nëntor, të gjithë në shesh, për të protestuar për arsimin që është në rrezik. Për të protestuar për të mbrojtur fëmijët që janë në rrezik. Për të mbrojtur familjet që janë në rrezik. Për të mbrojtur shoqërinë shqiptare që është në rrezik.”- tha Vokshi.
