Udhëheqësi suprem i talebanëve Mullah Hibatullah Akhundzada ka urdhëruar gjykatësit afganë që të zbatojnë plotësisht ligjin e sheriatit dhe dënimet e tij, të cilat përfshijnë gjymtime, rrahje dhe ekzekutime të llojeve të ndryshme. Njoftimi u bë të dielën nga zëdhënësi kryesor i talebanëve, Zabihullah Mujahid.
“Shqyrtoni me kujdes dosjet e hajdutëve, rrëmbyesve dhe rebelëve. Në ato dosje në të cilat janë plotësuar të gjitha kushtet e Sheriatit, ju jeni të detyruar t’i zbatoni. Ky është vendimi i Sheriatit dhe urdhri im, i cili është i detyrueshëm.” – ka pohuar Mujahid.
Në ligjin islam, të ashtuquajturat krime të Hududit kërkojnë dy prova vendosshmërisht bindëse që i akuzuari të dënohet, ndërkohë që mbart dënime të rënda, traumatike si prerja e duarve ose këmbëve, si dhe fshikullimi dhe ekzekutimi. Ky grup krimesh përfshin vepra të tilla si vjedhja, grabitja në autostradë, apostazia, tradhtia bashkëshortore dhe akuzimi i rremë i dikujt për të, shpifja, pirja e alkoolit dhe rebelimi.
Kisasi është efektivisht një variant islamik i drejtësisë ndëshkuese, ‘sy për sy’. Koncepti mbulon krime të tilla si plagosja e qëllimshme ose vrasja, ndërsa, në të njëjtën kohë u lejon viktimave ose familjeve të tyre të pranojnë kompensim material në vend të dënimit.
