Deputetja Monika Kryemadhi, ka deklaruar se do të marrin pjesë në primaret e organizuara nga Partia Demokratike në disa bashki, edhe kandidatë nga PL.
“Në disa bashki, ku ka pasur rakordim midis PD dhe PL, ku ka pasur kandidatë të pëlqyeshëm nga opozita, do të ketë një regjistrim të anëtarëve të PL që mund të marrin pjesë në procesin e primareve. Janë kandidatura me probabilitet të lartë për të fituar, por fokusi i PL janë këshillat bashkiakë, që t’i kthejmë në parlamente të qyteteve.”- tha Kryemadhi mbrëmjen e sotme në një intervistë për A2 CNN.
Lidhur me Primaret, Kryemadhi u shpreh se do të mbyllin etapën e fundit të përzgjedhjes së kandidatëve për zgjedhjet lokale.
“Primaret do të mbyllin etapën e fundit të përzgjedhjes së kandidatëve, që për mua është shumë e vonë, duhet të ishte bërë me kohë, por për shkak të kushteve e rëndësishme është që bëhet fjalë për një proces që Partia Demokratike e kishte premtuar. Ashtu siç kemi ne të Partisë së Lirisë referendumin. Pas primareve, vjen mendimi i strategjisë së përbashkët të fushatës elektorale për zgjedhjet e 14 majit.”– shtoi Kryemadhi.
