Izraeli ka vendosur armë të reja robotike në Bregun Perëndimor në mes të tensioneve të rritura mes izraelitëve dhe palestinezëve. Në qytetin e Hebronit dhe në kampin masiv të refugjatëve Al-Aroub, raportoi Associated Press të mërkurën, armë me telekomandë të afta për të gjuajtur gaz lotsjellës, granata trullosëse dhe plumba gome janë vendosur në pika të ndryshme.
Frëngjitë janë montuar në kulla speciale roje të pajisura me kamera vëzhgimi. Vetë armët kanë gjithashtu kamerat e tyre dhe operohen nga distanca nga ushtarët e Forcave të Mbrojtjes të Izraelit (IDF) brenda kullave, tha agjencia e lajmeve. Sipas AP, armët përdorin gjithashtu inteligjencën artificiale për të gjurmuar objektivat e tyre.
Armët u vendosën në dy pikat e nxehta ku kohët e fundit janë parë përleshje të rregullta midis protestuesve palestinezë dhe ushtarëve izraelitë. Tani, nëse turmat dalin në rrugë duke hedhur gurë dhe bomba kundër trupave izraelite, frëngjitë në kulla do të lëshojnë një breshëri gazi lotsjellës dhe plumbash gome, thanë burimet për agjencinë e lajmeve.
Izraeli këmbëngul se sistemet e reja do ndihmojnë për të shpëtuar jetët e izraelitëve dhe palestinezëve, duke shtuar se sistemet janë duke u testuar në këtë fazë dhe përdorin vetëm municion ‘jo vdekjeprurës’ për kontrollin e turmave. Palestinezët kanë frikë se sistemet e armëve mund të keqpërdoren ose hakerohen, tha AP, duke shtuar se vendasit gjithashtu kanë paralajmëruar se përdorimi i tyre mund të çojë në situata potencialisht vdekjeprurëse.
Frëngjitë e vendosura në Bregun Perëndimor u zhvilluan nga kompania Smart Shooter – një ndërmarrje që mburret me bashkëpunimin me një numër të ushtrive të botës, duke përfshirë ushtrinë amerikane.
